जनकपुरधाम, भदौ १५ गते । माधवकुमार नेपाल नेतृत्वको नेकपा (एकीकृत समाजवादी) पनि प्रदेश २ सरकारमा जाने तयारी थालेकाे छ ।
केन्द्रिय गठबन्धन अनुरूप जसपा नेतृत्व रहेको प्रदेश २ सरकारमा कांग्रेस, माओवादी संगै नेकपा एकीकृत समाजवादीलाई पनि सरकारमा सहभागी गराउन थालिएकाे हाे ।
नेकपा (एमाले) अधिकारिक रुपमा विभाजित भएर नेकपा एकीकृत समाजवादी दल दर्ता भएपछि सरकारमा सहभागी गराउने तयारी थालिएको बताइएको छ । संघीय सरकारमा सहभागी भए लगतै प्रदेश २ मा सरकारमा सहभागी हुने एकीकृत समाजवादीका प्रदेश सांसद शत्रोध्न महतोले बताए ।
उनले भने अनौपचारिक रुपमा कुरा भइरहेको छ तर बुधबारसम्म प्रदेश सांसदको सनाखत भएपछि सरकारमा जाने विषयमा मुख्यमन्त्रीसँग औपचारिक रुपमा छलफल हुनेछ ।
अहिले प्रदेशमा जनता समाजवादी पार्टी (जसपा) को नेतृत्वको सरकारमा नेपाली कांग्रेस र नेकपा माओवादी केन्द्र सहभागि रहेको छ । केन्द्रिय गठबन्धन अनुसार तात्कालिन सपाले राजपाबाट मन्त्री बनेका जितेन्द्र सोनललाई हटाएर कांग्रेसलाई सहभागी गराएको छ भने आफ्नै पार्टीका मन्त्री ज्ञानेन्द्र यादवलाई हटाएर माओवादीलाई सहभागी गराएका छन ।
कांग्रेसबाट रामसरोजले भौतिक पुर्वाधार विकास मन्त्रीको जिम्मेवारी पाएका छन भने माओवादीबाट भरत साहले आन्तरिक मामिला तथा सञ्चार मन्त्रीको जिम्मेवारी सम्हालेका छन । कांग्रेसले ३ वटा र माओवादीले एउटा मन्त्रालय पाएका छन ।
कांग्रेसले ३ वटा मध्ये एउटा भौतिक पुर्वाधार विकास मन्त्रालय र त्यसै मन्त्रालयलाई टुक्राएर खानेपानी तथा उर्जा मन्त्रालय ओमप्रकाश शर्मा र समाजिक विकास मन्त्रालयलाई टुक्रायाएर महिला तथा बालिका मन्त्रालय विरेन्द्र सिंहलाई जिम्मेवारी दिइएको छ ।
मुख्यमन्त्री सहित ७ वटा मन्त्रालयलाई टुक्राएर ११ वटा मन्त्रालय बनाइएको छ । हाल ११ मन्त्रालय मध्ये दुई वटा रिक्त रहेको छ ।
हाल मुख्यमन्त्री राउतले सम्हाल्दै आएका वाणिज्य, आपूर्ति तथा विज्ञान प्रविधि र कानून, न्याय तथा प्रदेश सभा मामिला मन्त्रालय एकीकृत समाजवादीलाई दिइने मुख्यमन्त्री श्रोतले जनाएको छ ।
यो विषयमा आफ्नो प्रतिक्रिया दिनुहोस् !