जनकपुरधाम, भदौ १३ गते । प्रहरी ड्रेसमै मदिरा खाएको आरोपमा धनुषाका एक प्रहरी सहायक निरिक्षक (सई) कारवाहीमा परेका छन ।
जनकपुरधामस्थित जानकी प्रहरी चौकीका इन्चार्ज सई नागेन्द्र यादव प्रहरीको ड्रेसमा बियर (मदिरा) खाएको भिडियो सामाजिक सञ्जालमा भाइरल भएपछि आवश्यक कारवाहीका लागि जिम्मेवारीबाट हटाइएकाे छ ।
प्रहरीको ड्रेस लगाएको अवस्थामा बियर खाइरहेकाे भिडियो सार्वजनिक भएपछि सई यादवलाई आवश्यक छानबीनका लागि जिम्मेवारीबाट हटाएर जिल्ला तानिएको कुरा प्रहरी उपरिक्षक प्रकाश रानाभाटले बताएका छन ।
उनले भने जिल्ला प्रहरी कार्यालय र प्रदेश प्रहरी कार्यालय संयुक्त रुपमा सो भिडियोमा देखाइएको कुरा बारे छानबीन प्रक्रिया अघि बढाइएको छ । यदि दोषी ठहरिए आवश्यक कारवाहीका लागि केन्द्रमा सिफारिस गरिनेछ ।
सई यादव प्रादेशिक अस्पतालको अगाडी रहेको दरभंगा सिटी स्क्यान भन्ने एक निजी स्वास्थ्य संस्थामा वर्दी लगाएकै अवस्थामा बियर खाइरहेकाे सामाजिक सञ्जालमा भिडियो भाइरल भएकाे थियाे ।
भिडियोमा सई यादव साउन १६ गते राती करिब १० बजेर ५३ मिनेटमा सिटी स्क्यानको ल्याबमा गएर कुर्सीमै एक छिन सुत्छन, त्यसको केही बेरमा ल्याबका एक कर्मचारी उनलाई उठाएर हातमा बियरको बोतल दिन्छन । प्रसनि यादव सो बियरको बोतलबाट प्लास्टिकको गिलासमा हालेर खाने गरेको सिसिटीभी फुटेजबाट तानिएको भिडियो देखिन्छ ।
दरभंगा सिटी स्क्यानका सञ्चालक केदार यादवसँग सई नागेन्द्र यादवको घनिष्ठता रहेको रातिको बेला थकाई मार्न सो ल्याबमा गई मदिरा सेवन गर्दै आएको बताइएको छ । दोहरो नागरिकको आरोप लाग्दै आएका यादवको गलत क्रियाकलापमा साथ दिदैं आएको कारण उनीहरुबीच घनिष्टता रहेको बुझिएको छ ।
ल्याबका लागि भारतबाट सामान ल्याउन संचालक केदारलाई सघाउंदै आएको कारण उनीहरुबीच नजिकता रहेको स्थानीयहरुको भनाई छ ।
यो विषयमा आफ्नो प्रतिक्रिया दिनुहोस् !