जनकपुरधाम, असार १७ गते । प्रदेश २ सरकारका राज्य मन्त्रीहरूले कार्य क्षेत्रकाे दायरा बढाउनु पर्ने मांग गरेका छन ।
प्रदेश तिनवटै राज्यमन्त्रीहरूले संवैधानिक व्यवस्था अनुसार अधिकार प्रत्यायाेजन गरि कार्य क्षेत्र बढाउनु पर्ने मांग गरेका हुन ।
आन्तरिक मामिला तथा कानून राज्यमन्त्री सरोज सिंह कुशवाहाले हैसियत अनुसारको जिम्मेवारी दिइ आफुहरूकाे कार्यक्षेत्रकाे दायरा बढाउनु पर्ने बताए ।
उनले भने, ‘राज्यमन्त्रीको हैसियत अनुसारको जिम्मेवारी मैले पाएको छैन, पाउनुपर्छ भन्ने मेरो भनाइ हो ।’ उनले राज्यमन्त्रीलाई ‘कामचलाउ’ रुपमा मात्रै राखिएको छ संवैधानिक व्यवस्था अनुसार कार्यक्षेत्रकाे दायरा बढाउनु पर्ने भने ।
राज्यमन्त्री कुशवाहाले राज्यमन्त्रीकाे पनि आफ्नाे कार्य क्षेत्रकाे दायरा ताेकिएकाे छ । तर काम गर्न कुनै जिम्मेवारी दिइएकाे छैन, हरेक काम मन्त्रीकै निर्देशनमा गर्नुपर्ने बाध्यता बनाइएकाे छ ।
उनले भने,‘मन्त्रालयभित्र हुने कुनैपनि कामको आफूलाई कुनै जानकारी हुँदैन् । राज्यमन्त्रीलाई कुनै अधिकार नै दिइएको छैन् । हामी मन्त्रालयमा आएर कुर्सीमा बस्ने काम मात्र गरेका छौं ।
त्यस्तै भूमि व्यवस्था, कृषि तथा सहकारी राज्यमन्त्री योगेन्द्र राय यादवले आफू कार्यप्रति सन्तुष्ट रहेकाे बताए पनि जिम्मेवारी र कार्यक्षेत्रकाे दायरा बढाउनु पर्ने भने ।
यस कुराप्रति आफ्नो असन्तुष्टि रहेको प्रतिक्रिया दिएका छन् ।
सरकार सञ्चालनमा अहिलेसम्म सबैकुरा ठिकै रहेपनि धेरै सवालमा राज्यमन्त्रीको क्षेत्राधिकारको बिषयमा अझै प्रष्ट गर्नुपर्ने आवश्यकता रहेकाे बताए ।
उनले अधिकार प्रत्यायोजनको सवालमा केही दायरा बढाउनुपर्ने आवश्यकता रहेको छ केही काम गर्दा मन्त्री संग समनव्य गर्नुपर्ने बाध्यता हटाउनु पर्छ ।
त्यस्तै, आर्थिक मामिला तथा योजना राज्यमन्त्री उषा यादवले आफ्नो मन्त्रालयमा मन्त्री र राज्यमन्त्रीबिच त्यस्तो कुनै मटमुटाव नरहेको बताईन् । उनले क्याबिनेट मन्त्रीको निर्देशनानुसार नै राज्यमन्त्रीहरु चल्ने भएकोले सोही अनुसार आफूले काम गरिरहेको जानकारी दिईन् ।
यद्यपी अधिकार प्रत्यायोजनको सवालमा भने अझै केही दायरा बढाउनुपर्ने आवश्यकता रहेको धारणा उनले पनि व्यक्त गरिन ।
प्रदेश २ सरकारमा ६ जना राज्य मन्त्री मध्ये हाल तिनजना राज्यमन्त्रीहरु मात्रै रहेका छन् । मुख्यमन्त्री लालबाबु राउतले जनता समाजवादी पार्टीको महन्थ ठाकुर समूहनिकट एक मन्त्री र तिन राज्यमन्त्रीलाई गत जेठ २३ गते बर्खास्त गरेपछि अहिले तिनजना राज्यमन्त्रीहरु सिमित भएका छन् ।
उपेन्द्र यादवनिकट मुख्यमन्त्री राउतले भौतिक पूर्वाधार विकास मन्त्री जितेन्द्र सोनलसहित सामाजिक विकास राज्यमन्त्री अभिराम शर्मा, भौतिक पूर्वाधार विकास राज्यमन्त्री डिम्पल झा र उद्योग, पर्यटन, वन तथा वातावरण राज्यमन्त्री सुरेश मण्डललाई बर्खास्त गरेका थिए ।
यो विषयमा आफ्नो प्रतिक्रिया दिनुहोस् !