जनकपुरधाम, जेठ ३० गते । प्रस्तुत नीति तथा कार्यक्रमको पक्षमा मतदान गर्न प्रदेश २ सरकारका सत्तारुढ दल जनता समाजवादी पार्टी र कांग्रेसले व्हीप जारी गरेका छन । दुवै दलले सरकारमा उपस्थिति नभएका असन्तुष्ट प्रदेश सभा सदस्यहरुले नीति तथा कार्यक्रमको विपक्षमा जान सक्ने व्हीप जारी गरेका हुन ।
जसपा भित्र आन्तरिक किचिलोले पछिल्लो पटक उपेन्द्र यादव समूहले ठाकुर समूहका राज्यमन्त्री सहित चार जना मन्त्रीलाई बर्खास्त गरेपछि प्रदेश सभा बैठक बहिष्कार गर्दै ठाकुर समूहका प्रदेश सभा सदस्यहरुले मतदान गर्दैन भनी सचेत गराउन व्हीप जारी गरिएको बुझिएको छ ।
यादव समूहका संसदीय दलका नेता एवं मुख्यमन्त्री लालबाबु राउतले ठाकुर २५ जना प्रदेश सभा सदस्यलाई मोबाइल मार्फत सन्देश पठाई नीति तथा कार्यक्रमको पक्षमा मतदान गर्न भनी व्हीप जारी गरेको बताइएको छ ।
जसपा भित्रको पछिल्लो घटना क्रमको कारण असन्तुष्ट पक्षले नीति तथा कार्यक्रमको विपक्षमा जान सक्ने भएको हुनाले ह्वीप जारी गर्नु परेको जसपाका प्रमुख सचेतक शैलेन्द्र यादवले जानकारी दिए । उनले भने मन्त्रीहरुलाई बर्खास्त गरेपछि मुख्यमन्त्री लालबाबु राउतले शुक्रवार दिउंसो नै संसदीय दलका बैठक बोलाई नीति तथा कार्यक्रमको पक्षमा मतदान गर्न निर्णय सहितको ह्वीप जारी गरेको थियो । सो निर्णयको जानकारी बैठकमा सहभागी नभएका प्रदेश सभा सदस्यहरुलाई ईमेल र मोबाइलको मैसेज मार्फत सूचना पठाइएको हो ।
यता जसपा ठाकुर समूहका प्रदेश सभा सदस्य परमेश्वर साहले निति तथा कार्यक्रमको आफूहरुले समर्थन गर्ने जानकारी दिए । उनले हाम्रो असन्तुष्टि पार्टी र सरकारप्रति हो, निति तथा कार्यक्रम जनताको लागि भएको कारण आफूहरु विपक्षमा नजाने निर्णय गरेका हौं भने ।
अर्का सत्तारुढ दल नेपाली कांग्रेसले पनि व्हीप जारी गरेको बताइएको छ । कांग्रेसका प्रमुख सचेतक उपेन्द्र कुशवाहाले आफ्ना पार्टीका सबै प्रदेशसभा सदस्यहरुलाई आज बस्ने बैठकमा अनिवार्य रुपमा उपस्थित भई नीति तथा कार्यक्रमको पक्षमै मतदान गर्न भनी व्हीप जारी गरिएको बताए ।
व्हीप नै जारी गर्नुपर्ने अवस्था किन आयो भन्ने प्रसंगमा उनले भने केही सदस्य जानी जानी बैठकमा आउंदैन, कोही असन्तुष्ट हुन सक्छ त्यसैले व्हीप जारी गर्नु परेको हो । पार्टी सरकारमा गएपछि मनपरी रुपमा मन्त्री बनाइएको भनी असन्तुष्ट रहेका केही प्रदेशसभा सदस्यहरु नीति तथा कार्यक्रमको विपक्षमा मतदान गर्ने कुरा आएपछि व्हीप जारी गरिएको नाम नखोलाउने शर्तमा कांग्रेस श्रोतले जनाएको छ ।
प्रदेश प्रमुख राजेश झाले जेठ २७ गते प्रदेशसभामा प्रस्तुत गरेको नीति तथा कार्यक्रम आज बस्न लागेको प्रदेशसभा बैठकबाट निर्णयार्थ प्रस्तुत गरिने बहुमतबाट पारित हुनेप्रदेशसभा सचिवालयका सचिव रंजित यादवले जानकारी दिएका छन ।
यो विषयमा आफ्नो प्रतिक्रिया दिनुहोस् !