जनकपुरधाम, जेठ २४ गते । धनुषामा अझै ७ दिनका लागि निषेधाज्ञा थपिएको छ ।
सोमबार जिल्ला कोभिड १९ संकट व्यवस्थापन समितिको बसेको बैठकबाट संक्रमणको दर कम हुन नसकेको ठहर गर्दै जेठ ३१ गतेसम्मका लागि निषेधाज्ञा यथावत राख्ने निर्णय गरिएको प्रमुख जिल्ला अधिकारी बन्धु प्रसाद वास्तोलाले जानकारी दिए ।
कोभिड–१९ संकट व्यवस्थापन अध्यादेश २०७८ को दफा ५ को उपदफा २ तथा स्थानीय प्रशासन ऐन, २०२८ को दफा ६ को उपदफा ३ ले दिएको अधिकार प्रयोग गरी जिल्लामा जेठ २४ गते राति १२ बजे देखि जेठ ३१ गते राति १२ बजेसम्म लागू हुने गरी निषेधाज्ञा लम्ब्याएको उनले बताए ।
धनुषामा बैशाख २१ गतेदेखि निषेधाज्ञा लगाइएको पाँचौ पटकका लागि थप गरिएको हो । निषेधाज्ञ अवधिमा बिहान ६ बजेदेखि ९ बजेसम्मका लागि तरकारी, बजार हाट र खाद्यान्न सामाग्रीको पसल संचालनलाई यथवतै राखिएको छ ।
निषेधाज्ञा अवधिमा सार्वजनिक तथा निजी सवारी साधनमा रोक लगाइएको छ भने मालबाहक सवारी साधन, सुरक्षा र स्वास्थ्य सेवा एवं सो सम्बद्ध कर्मचारीहरुले प्रयोग गर्ने सवारी साधन, दुरसंचार, इन्टरनेट, एम्बुलेन्स, दमकल, शववाहन, फोहरमैला व्यवस्थापन, खाद्यान्न, फालफुल, पेट्रोलियम पदार्थ, लगायतका अत्यावश्यक सेवा र कार्यमा प्रयोग हुने अनुमति प्राप्त सवारी साधनमा रोक लगाइएको छैन् ।
बैठकले सबै प्रकारको सभा, सम्मेलन, गोष्ठी, तालिम, सेमिनार, सिनेमा हल, पार्टी प्यालेस, स्वीमिङ्गपुल, हाट बजार, मनोरञ्जन स्थल, सैलुन, ब्यूटि पार्लर, जिम खाना, समूहमा खेलिने खेलकुद, पुस्तकालय, संग्रहालय आदी संचालनमा रोक लगाइएको छ । वैवाहिक कार्यक्रममा स्वास्थ्य मापदण्डको पालना गरी बढिमा १५ जनालाई सहभागी हुन दिने जनाइएको छ ।
यो विषयमा आफ्नो प्रतिक्रिया दिनुहोस् !