जनकपुरधाम, जेठ १८ गते । जनता समाजवादी पार्टी (जसपा)को संघीय परिषद् अध्यक्ष बाबुराम भट्टराई, अध्यक्ष उपेन्द्र यादव पक्षले पार्टी अध्यक्ष महन्थ ठाकुर र राजेन्द्र महतो सहित चार नेतालाई पार्टीबाट निष्कासन गरेको छ ।
प्रधानमन्त्री केपी शर्मा ओली सरकारको प्रतिगमनमा कांध थाप्ने गरी सहयोग गरेको भन्दै जसपाका यादव र भट्टराई पक्षले अध्यक्ष महन्थ ठाकुर, राजेन्द्र महतो, लक्ष्मणलाल कर्ण र सर्वेन्द्रनाथ शुक्ला सहितका नेतालाई पार्टीबाट निष्काषण गरेको हो ।
मंगलबार पार्टी कार्यालय बालकुमारीमा बसेको कार्यकारिणी समितिको बैठकबाट पार्टीको विधान र राजनीतिक दल सम्बन्धी ऐनको व्यवस्था बमोजिम तिनीहरुलाई निषकासन गरिएको कुरा एक प्रेस विज्ञप्ति जारी गरी जनाएको छ ।
दुई/दुई पटक प्रतिनिधि विघटन जस्ता अलोकतान्त्रिक, अधिनायकवादी र प्रतिगमनकारी कदम चाल्ने प्रधानमन्त्री ओलीलाई साथ दिने भन्ने हामीले कल्पनासम्म गरेका थिएनौं । महन्थ ठाकुर लगायतका नेताहरुले मधेशको मांग पुरा भएको भनी भ्रम छरेर संकटग्रस्त ओली सरकारलाई कांध थाप्ने र प्रतिगमनको मतियार बन्ने काम गरेकोमा पटक पटक गलती सच्याउन आग्रह गर्दा नमानेपछि पार्टीबाट निष्काषण गर्नु परेको विज्ञप्तिमा भनिएको छ ।
उनीहरुलाई कारबाही गरिएको जानकारी निर्वाचन आयोगलाई जानकारी गराइसकेको बताइएको छ । जसपामा केपी शर्मा ओली नेतृत्वको सरकारमा जाने कि नजाने भन्ने विषयमा विवाद चर्किँदो छ । ठाकुर–महतो पक्षले ओली नेतृत्वको सरकारमा सहभागी हुने निर्णय गरिसकेको छ । उता भट्टराई–यादव समूहले भने ओली नेतृत्वको सरकारको विकल्पमा नयाँ सरकार बनाउनुपर्ने बताउँदै हस्ताक्षर समेत गरिसकेको छ ।
यो विषयमा आफ्नो प्रतिक्रिया दिनुहोस् !