जनकपुरधाम, बैशाख २८ गते । लताकपडा बाँड्दै आएका जनकपुरधाम स्थित क्लोथ बैंक अहिले होम आइसोलेशनमा बसेका कोरोना संक्रमितलाई प्राणवायु अर्थात आक्सीजन ग्यास सेवा उपलब्ध गराउनमा व्यस्त देखिएका छन ।
कोरोना महामारीसँग लड्न संघ, प्रदेश र स्थानीय तीनवटै तहका सरकार असक्षम हुँदै गएपछि आम जनताको स्वास्थ्यको ख्याल गर्दै क्लोथ बैंक नेपाल निशुल्क रुपमा आक्सीजन ग्यास र चिकित्सकीय परामर्श सेवामा जुटेका छन ।
पहिलो चरणको कोरोना संक्रमण फैलिएदेखि होम आइसोलेशनमा बसेका संक्रमितहरुलाई आक्सीजन ग्यासका साथै निशुल्क चिकित्सकीय परामर्श सेवा दिन सफल भएका क्लोथ बैंक अहिले दोश्रो चरणको कोरोना लहरमा पनि घर घरमा पुगी आक्सीजन ग्यास र चिकित्सकीय परामर्शका साथै थप सुविधा पीसीआर चेकजाँचका लागि स्वाब संकलन कार्यलाई तिव्रता दिएका छन ।
क्लोथ बैंकको निगरानीमा होम आइसोलेशनमा बसेका ७७ जना संक्रमित मध्ये २९ जनालाई घरमै आक्सीजन सेवाको व्यवस्थापनका साथै गरीब असहाय संक्रमितहरुलाई आवश्यक औषधि तथा स्वास्थ्य चेकजाँचको व्यवस्थापन गर्दै आएको बैंकका संयोजक राजीव झाले बताए ।
उनले भने हामी ८० जना चिकित्सकको व्यवस्थापन गरेका छौं जसमध्ये हाल २१ जना चिकित्सक २४ औं सेवा चिकित्सकीय परामर्शका लागि खटेका छन । बिहान, बेलुका राति जुन बेला पनि धनुषा जिल्लाभरिका संक्रमितले फोन गरेमा बिहान, बेलुका र राति जुन बेला पनि काँधमै बोकेर संक्रमितहरुको घरसम्म पुरयाउने गरेका छौं ।
संस्थाले कोरोना संक्रमितले दिदैं आएको सेवा बारे उनले भने आफ्नो सम्पर्कमा रहेका संक्रमितहरुको निगरानी फोन वा अनलाईन मार्फत गर्ने गरेका छौं भने चिकित्सकीयहरु पनि फोन वा अनलाईन मार्फतै सल्लाह सुझाव र औषधोपचार गर्ने गरेका छन, आवश्यक परेको खण्डमा सुरक्षाको सम्पूर्ण मापदण्ड अपनाई चिकित्सकहरु घरसम्म पुगेर सेवा दिदैं आएको छ ।
विभिन्न दाता तथा पदाधिकारीहरुको सहयोगमा संचालन हुँदै आएको सो कोभिड होम आइसोलेशन परामर्श मार्फत पहिलो चरणको कोरोनामा समेत अढाई सयभन्दा बढी संक्रमित बिरामीलाई आक्सीजन सहित चिकित्सकीय परामर्श सेवा दिएका थिए ।
क्लोथ बैंकले संक्रमितहरुको नाम, नम्बर र ठेगाना समेत लिई विधिवत रुपमा नाम दर्ता गरेर सेवा दिदैं आएका छन । कुन संक्रमितको अवस्था कस्तो छ समय समयमा जानकारी गराउन सल्लाह दिइन्छ, संस्था सँग आबद्ध चिकित्सक र पदाधिकारीहरुले समेतले बिहान र बेलुका दैनिक दूई पटक संक्रमितको स्वास्थ्य अवस्था जानकारी लिने गरेको उनले बताए ।
जसपा नेता समेत रहेका झाको संयोजकत्वमा रहेको सो क्लोथ बैंकको होम आइसोलेशन सेवा टिममा प्रदेशका भूमि व्यवस्था, कृषि तथा सहकारी मन्त्री शैलेन्द्र साह, उद्योग वाणिज्य संघका पदाधिकारी, राजनीतिकर्मी, जनकपुरधाम उपमहानगरपालिकाका केही जनप्रतिनिधि, पत्रकार तथा स्थानीय समाजसेवीहरु आबद्ध रहेका छन ।
यो विषयमा आफ्नो प्रतिक्रिया दिनुहोस् !