मालपोत र नापी कार्यालयका सम्पूर्ण सेवा आइतवारदेखि बन्द

जनकपुरधाम, वैशाख १७ गते । धनुषाको जनकपुरधामस्थित मालपोत र नापी कार्यालयले कोरोना संक्रमण बढदै गएको दृष्टिगत गर्दै आइतबारदेखि आफ्ना सम्पूर्ण सेवा अनिश्चितकालका लागि बन्द गरेका छन ।

जनकपुरधामस्थित भूमिसुधार तथा मालपोत र नापी कार्यालयले कोरोना संक्रमणको दोस्रो भेरियन्ट तिव्र रुपमा फैलिन थालेपछि आइतबारदेखि अर्को सूचना जारी नभएसम्मका लागि मुद्दाबाहेकका सबै सेवा अनिश्चितकालका लागि बन्द गर्ने निर्णय गरेको हो ।

कारोना भाइरसको दोस्रो चरणमा धेरै मानिसहरु प्रभावित भईरहेको र यस जिल्लामा पनि प्रभावितहरुको संख्या बढेदै गईरहेकोले जोखिम नियन्त्रण गर्न, भीडभाड कम गरी कार्यालय सञ्चालन गर्ने व्यवस्था मिलाउँदा समेत झन् भीड बढ्न गएकोले महामारीको प्रकोपबाट बच्न यस कार्यालयबाट प्रवाह गरिंदै आएका मुद्दा बाहेकका सेवाहरु अर्को सूचना नभएसम्मका लागि स्थगित गरिएको जारी सूचनामा उल्लेख छ ।

साथै कर्मचारीहरुलाई सबै दिन कार्यालयमा उपस्थित भई कार्यालयका आन्तरिक काम गर्नुपर्ने र सरकारी कार्यालयबाट इमेल मार्फत मांग गरिएको विवरण उपलब्ध गराउने कुरा समेत मालपोत कार्यालयका प्रमुख बासु प्रसाद कोइरालाद्वारा जारी सूचनामा भनिएको छ ।

त्यसैगरी आइतबारदेखि नापी कार्यालय धनुषाले समेत आफ्नो सेवा बन्द गर्ने निर्णय गरेको छ । अर्को सूचना जारी नभएसम्मका लागि आइतबारदेखि सम्पूर्ण सेवा स्थगित गर्ने निर्णय गरिएको नापी अधिकृत विन्देश्वर यादवद्वारा जारी सूचनामा भनिएको छ ।