जनकपुरधाम, वैशाख १७ गते । धनुषा लगायत देशका २२ जिल्ला कोरोना संक्रमणबाट अति प्रभावित रहेकोले सतर्क र सचेत रहन सरकारले आग्रह गरेको छ ।
स्वास्थ्य मन्त्रालयले शुक्रबार सूचना जारी गरी स्वास्थ्य प्रणालीले थेग्नै नसक्ने गरी संक्रमण बढदै गएको भन्दै यी २२ जिल्लावासीलाई सचेत रहन अपिल गरेको छ ।
स्वास्थ्य मन्त्रालयका अनुसार नेपालका अतिप्रभावित जिल्लाहरू धनुषा, मोरङ, सुनसरी, झापा, पर्सा, बारा, काठमाडौं, भक्तपुर, ललितपुर, चितवन, मकवानपुर, काभ्रेपलाञ्चोक, कास्की, दाङ, बाँके, रुपन्देही, पाल्पा, बर्दिया, कपिलवस्तु, सुर्खेत, कैलाली र कञ्चनपुर रहेका छन् ।
‘स्वास्थ्य प्रणालीले थेग्नै नसक्ने गरी संक्रमण बढेकोले अस्पतालमा राखेर हेरचाह गर्न अस्पताल शैय्या उपलब्ध गराउन नसकिने भइसकेको छ’ मन्त्रालयद्वारा जारी अपिलमा भनिएको छ, ’त्यसैले सबै दाजुभाई दिदी बहिनीमा संवेदनशील हुन हार्दिक अनुरोध छ ।’
संक्रमण फैलिनबाट रोक्नका लागि जनस्वास्थ्यका मापदण्डहरू मास्क लगाउने, भौतिक दूरी कायम गर्ने, नियमित साबुनपानीले हात धुनु नै सबैभन्दा उत्तम उपाय भएको मन्त्रालयको भनाइ छ ।
यो विषयमा आफ्नो प्रतिक्रिया दिनुहोस् !