जनकपुरधाम, वैशाख १५ गते । विश्व बैंकले दिएको ऋणबाट सरकारले अक्सिजन सिलिन्डर खरिद गर्ने भएको छ ।
विश्व बैंकले कोभिड–१९ रोकथामका लागि सरकारलाई दिएको ७ करोड ५० लाख अमेरिकी डलर ऋणबाट स्वास्थ्य सेवा विभागले अक्सिजन सिलिन्डरसँगै पीसीआर, आरएनए र भीटीएम लगायतका सामग्री खरिद गर्न लागेको हो ।
बैशाख १३ मा बसेको मन्त्रिपरिषद्को बैठकले स्वास्थ्य तथा जनसंख्या मन्त्रालयले अक्सिजनको अभाव हुन नदिन आवश्यक सबै व्यवस्था गर्ने निर्णय गरेको थियो । पर्याप्त अक्सिजन सिलिन्डर उपलब्ध हुने गरी आयात गर्ने निर्णय भएको सरकारका प्रवक्ता पार्वत गुरुङले जानकारी दिएका छन ।
विभागका खरिद प्रमुख उपेन्द्र ढुंगानाले एक हजार सिलिन्डरका लागि खरिद प्रक्रिया अघि बढाएको जानकारी दिए । गत माघमा पनि विभागले एक हजार सिलिन्डर खरिद गरी अस्पतालहरूमा बाँडेको थियो । तर, दोस्रो भेरियन्टको कोभिड–१९ संक्रमित बिरामीको संख्या बढ्दै गएपछि खरिद प्रक्रिया अघि बढाएको उनले जानकारी दिए ।
सिलिन्डरका लागि अस्पतालहरूले समेत खरिद प्रक्रिया अघि बढाए पनि माग अनुसार सिलिन्डर अझै अपुग हुने ढुंगानाले बताए । ’विभाग बाहेक अन्य अस्पतालहरूले समेत अक्सिजन सिलिन्डर खरिदका लागि प्रक्रिया अघि बढाइसकेका छन ।
तत्काल खरिद गर्न सम्भव नभएमा सहायता स्वरुप सिलिन्डर प्राप्त गर्न कूटनीतिक पहल गर्ने उनले जानकारी दिए । ’सञ्चालनमा नरहेका अक्सिजन प्लान्टको तत्काल मर्मत सम्भार गरी पूर्ण क्षमतामा सञ्चालन हुने व्यवस्था मिलाउने,’ गुरुङले भने ।
विभागले २० हजार सिलिन्डरका लागि जोहोसमेत गर्ने प्रयास गरिरहेको उनले जानकारी दिए । खरिद प्रक्रिया अनुसार ढिलाइ हुने भएकाले अन्य स्रोतमार्फत सिलिन्डर खरिद गर्नुपर्ने भएको ढुंगानाले जानकारी दिए । बोलपत्र आह्वानमार्फत सिलिन्डर खरिद नगर्दा सरकारले सोझो खरिदको प्रक्रिया पु¥याउनुपर्ने हुन्छ । त्यसबाहेक अन्तर्राष्ट्रिय दाताबाट अनुदानमा सिलिन्डर ल्याउन पहल गर्ने अर्को माध्यम हुनसक्ने उनले बताए ।
मन्त्रिपरिषद्को बैशाख १३ गते बसेको बैठकले अक्सिजन सिलिन्डर आयातमा कर छुट दिने निर्णय गरेको समेत सरकारका प्रवक्ता गुरुङले जानकारी दिए । सिलिन्डरको आयातमा १५ प्रतिशत भन्सार महसुल, ५ प्रतिशत अन्तःशुल्क र मूल्य अभिवृद्धि कर लाग्दै आएको छ । अक्सिजन नेपालमै उत्पादन हुने भए पनि त्यसका लागि आवश्यक पर्ने सिलिन्डर भारत र चीनबाट आयात हुने गरेको छ ।
यो विषयमा आफ्नो प्रतिक्रिया दिनुहोस् !