जनकपुरधाम, बैशाख १० गते । प्रदेश २ का मुख्यमन्त्री लालबाबु राउतले तिव्र रूपमा फैलिदै गएकाे कोरोना संक्रमण नियन्त्रणका लागी आवश्यक तयारीमा जुटन सरोकारबला निकायहरुलाई निर्देशन दिएका छन ।
शुक्रवार प्रादेशिक कोरोना संकट व्यवस्थापन समितिको बैठकमा मुख्यमन्त्री राउतले प्रदेशका सबै निकायहरुलाई महामारीकाे रूप लिईरहेकाे काेराेना संक्रमण नियन्त्रणका लागि आ–आफनो क्षेत्रको तयारीमा कुनै कमी नराख्न निर्देशन दिए ।
बैठकबाट आठवटै जिल्लामा रहेको पिसिआर ल्याबका लागी आवश्यक सामग्री तथा थप जनशक्तिको विवरण तयार गर्ने जिम्मेवारी प्रादेशिक जनस्वास्थ्य प्रयोगशालाका प्रमुखलाई दिइएकाे छ ।
जिल्लाहरुमा आवश्यक जनशक्ति तथा सामग्रीहरुको विवरण सम्बन्धित मन्त्रालयले जिल्ला कोरोना संकट व्यवस्थापन समितिहरु बाट संकलन गर्ने, प्रादेशिक अस्पताल स्थित नर्सिङ्ग कलेजलाई पुनः कोभिड अस्पतालमा रुपान्तरण गर्ने निर्णय गरिएकाे छ ।
त्यसैगरि बैठकले कोरोना महामारी नियन्त्रणका लागि आवश्यक योजना तयार गर्न समाजिक विकास मन्त्रालयलाई निर्देशन दिएको छ ।
बैठकबाट महामारी नियन्त्रणका लागि प्रमुख सचिवको नेतृत्वमा सबै मन्त्रालयका सचिव र सुरक्षा निकायहरुका प्रमुख रहने गरि संयोजन कमिटी गठन गरिएकाे छ ।
त्यस्तै आपूर्ति महाशाखाका प्रमुख डा प्रमोद कुमार यादवको नेतृत्वमा मधेश स्वास्थ्य विज्ञान प्रतिष्ठानका रजिष्टार डा. विनोद यादव, प्रादेशिक अस्पतालका मेसु डा. प्रमोद यादव र प्रादेशिक जनस्वास्थ्य प्रयोगशालाका प्रमुख डा. श्रवण मिश्र सदस्य रहने प्राविधिक समिति समेत गठन गरिएकाे छ ।
यो विषयमा आफ्नो प्रतिक्रिया दिनुहोस् !