जनकपुरधाम, वैशाख ७ गते । कोरोना संक्रमणको दोस्रो लहर सुरु भएसँगै धनुषामा आंशिक लकडाउन शुरू गरिएकाे छ ।
जिल्ला संकट व्यवस्थापन समितिको बैठकले अत्याधिक भिड हुने स्थान हाट बजारमा कडाई गर्न निर्णय गर्दै आंशिक लकडाउन शुरू गरिएकाे हाे ।
धनुषाका प्रमुख जिल्ला अधिकारी बन्धुप्रसाद बास्तोलाले बैठकबाट जिल्लाको विभिन्न स्थानमा रहेको हाट बजारलाई विहान ७ बजेदेखि १० बजेसम्म र दिउँसो ४ बजे देखि साँझ ७ बजेसम्म मात्र संचालन गराउन निर्णय भएको जनाएकाे छ ।
बाजार अनुगमनको जिम्मा सम्बन्धित स्थानीय तह र नेपाल प्रहरीलाई दिइएको बताइएकाे छ ।
त्यस्तै सरकारी कार्यालयहरुमा अत्याधिक भिड हुने गरेकोले भीडभाड कम गरी संक्रमण जोखिम न्यूनिकरण गर्न अनलाईन प्रणाली लगायत अन्य वैकल्पिक प्रणालीको प्रयोग गर्ने तथा स्थानीय तह अनुसार आलोपालो प्रणालीमार्फत सेवा दिने निर्णय समेत भएको छ ।
नेपाल सरकारको निर्णयमा आधारित भई संक्रमणको विद्यमान अवस्था र जोखिमको विश्लेषण गरी वैशाख मसान्तसम्म विद्यालयहरु बन्द गर्ने तथा परीक्षा सुरु भइसकेको अवस्थामा वैशाख १० गते भित्र सम्पन्न गर्ने व्यवस्था मिलाउने निर्णय भएको प्रजिअ बास्तोलाले बताए ।
धनुषाको स्थानीय तहको सीमानाका भारतसँग जोडिएको हुनाले सीमानाकामा अनिवार्य रुपमा हेल्प डेस्क स्थापना गरी संचालनमा ल्याउने तथा आवश्यकता अनुसार होल्डीङ सेन्टरको व्यवस्था गर्ने निर्णय भएको छ ।
साथै उपमहानगरपालिकालाई ३०, नगरपालिकालाई २० र गाउँपालिकालाई कम्तिमा १५ वटा आइसोलेशन बेड तथा क्वारेन्टिनको व्यवस्था गराउने निर्णय भएको छ ।
कोरोना परिक्षणको लागि प्रादेशिक जनस्वास्थ्य प्रयोगशाला जनकपुरधाममा जनशक्तिको अभाव भएकोले पिसिआर परिक्षणलाई प्रभावकारी बनाउनको लागि कर्मचारी आपुर्ती गर्न सामाजिक विकास मन्त्रालयसँग अनुरोध गर्ने निर्णय समेत भएको उनले बताए ।
यो विषयमा आफ्नो प्रतिक्रिया दिनुहोस् !