जनकपुरधाम, चैत ३० गते । करीब ६ महिनापछि प्रदेश २ प्रदेश सभाको बस्न लागेको बैठकमा सत्ताधारी दल जनता समाजवादी पार्टी नेता विहिन हुनेछ ।
जसपाले नयाँ संसदीय दलको नेता चयन गर्न नसक्दा सोमवार दिउंसो १ बजे बस्न लागेको बैठकमा दलको नेता विहिन हुनेछ । राजपा र सपा एकीकृत भई जसपा गठन भएको एक वर्ष वित्न लाग्दा पनि नेता चयन गर्न सकेको छैन ।
पांचौ अधिवेशनको पहिलो दिनको बैठकमा अधिवेशन आह्वान सम्बन्धी पत्र सभामुख सरोजकुमार पढेर सुनाउने, प्रदेश प्रमुखबाट प्रमाणीकरण भएका विधेयक बारे जानकारी गराइने र अधिवेशन प्रारम्भ भएको अवसरमा सांसदहरुले आ आफ्ना भनाई राख्ने कार्य सूची रहेको छ ।
प्रदेश नम्बर २ मा सरकारको नेतृत्व गरिरहेको जनता समाजवादी पार्टी पहिलो पटक प्रदेश सभामा नेता विना नै उपस्थित हुन लागेको छ । प्रत्येक दलबाट नेताहरुले धन्यवाद ज्ञापन गर्ने कार्य सुचिमा सत्ताधारी दलबाट कसले धन्यावद ज्ञापन गर्ने अन्यौलता बढेको छ ।
जसपाभित्र दलको नेतामा देखिएको विवादका कारण सपाबाट मुख्यमन्त्रीको हैसियतमा लालबाबु राउतले आफ्नो धारणा राख्ने बुझिएको छ । राजपाका नेता रहेका जितेन्द्र सोनल दलका नेताको हैसियतमा सम्बोधन गर्ने बारे अन्यौलता बढेको छ ।
संसदीय दलको समायोजनाका लागि निर्वाचन आयोग देखि प्रदेश सभा समेतले ताकेता गर्दा समेत कुनै चासो नलिएको बताइएको छ । मुख्यमन्त्री लालबाबु राउतले समेत प्रदेश सभालाई छल्दै आएका छन । जसपाकै प्रदेश सभा सदस्यहरुले समेत संसदीय दलको समायोजन र नेता चयन गर्न चासो नदेखाएको प्रति असंतुष्टि जनाउंदै आएका छन ।
संसदीय दल समायोजन भए नेता चयनको प्रक्रिया सुरु गरिने र नेता चयनमा अल्पमतमा पर्ने सम्भावना देखिएपछि मुख्यमन्त्री लालबाबु राउतले नेता चयनको लागि चासो नदेखाएको आरोप लाग्दै आएको छ । दलको नेता चयन गर्ने जिम्मेवारी दुवै दलका नेतालाई दिएका छन ।
जसपाका नेता एवं प्रदेश सभा सदस्य मनिषकुमार सुमनले संसदीय दलको विधान निमाृण गरेर समेत पार्टीलाई बुझाइएको र पार्टीका केही नेताहरुले नै समायोजना गर्न नचाहेको कारण दुवै पार्टी पुरानै नाममा दर्ता रहेको छ ।
यो विषयमा आफ्नो प्रतिक्रिया दिनुहोस् !