जनकपुरधाम, चैत २९ गते । जनकपुरधाम उद्योग वाणिज्य संघको नयाँ नेतृत्वका लागि सम्पन्न निर्वाचनको मतगणना विरुद्ध असन्तुष्ट पक्षले निर्वाचन समिति विरुद्ध विरोध प्रदर्शन गरेका छन ।
आइतवार बिहान करीब साढे १० बजेतिर वरिष्ठ उपाध्यक्ष पदको मतगणनाको क्रममा उम्मेदवार सुरेन्द्र भण्डारी पक्षधरले मतदानभन्दा बढी मत मतगणनामा फेला परेको भन्दै प्रदर्शन गरेका हुन ।
प्रदर्शनले अवस्था तनावग्रस्त बनेपछि प्रहरीले व्यापक संख्यामा नेपाल तथा शसस्त्र प्रहरी मतगणना स्थल गोपाल धर्मशालामा तैनाथ गरिएको छ । विवादित समूहका पक्षधरले निर्वाचन समितिको विरोध गर्दै टायर बालेर प्रदर्शनका गर्नुका साथै ढुंगामुढा समेत प्रहार गरेका छन ।
प्रदर्शनकारी समूहबाट ढुंगामुढा प्रहार भएपछि प्रहरीले लाठी चार्ज समेत गरेका छन । सो लाठी चार्जबाट ४/५ जना प्रदर्शनकारी सामान्य घाइते भएको बताइएको छ । प्रदर्शनकारीहरुले ४३११ मात्र मतदान भएकोमा मतपरिणाम ४४ सयभन्दा भन्दा बढी देखिएको कारण विवाद भएको बताएका छन ।
निर्वाचन समिति श्रोतका अनुसार मतगणनामा मनिष रमण साहले अग्रता लिएपछि प्रतिष्पर्धी उम्मेदवार भण्डारी पक्षका व्यक्तिहरुले डेढ सय मत बढी भएको भन्दै विवाद उत्पन्न गरेको हो । सो श्रोतका अनुसार वरिष्ठ उपाध्यक्ष पदका मतगणना असन्तुष्ट पक्षको विवादको कारण हाल अवरुद्ध रहेको छ ।
उनले भने हामीले पुनः मतगणना गर्न असन्तुष्ट पक्षलाई भनिरहेका छौं तर उनीहरु मतगणना होइन पुनः निर्वाचनमै जानुपर्ने अडान राखेको विवाद समाधान हुन सकेको छैन । घटना स्थलमा उपस्थित प्रहरी निकाय असन्तुष्ट पक्ष र निर्वाचन समितिलाई बसेर वार्ताको माध्यमबाट समस्या समाधानको प्रयासमा जुटेका छन ।
यता अध्यक्ष पदमा जितेन्द्र महासेठ एक हजारभन्दा बढी मतले विजयी घोषित भइसकेको छ भने महासचिव पदमा मनोज साह, कोषाध्यक्ष पदमा परमेश्वर साह र सचिवमा फुलदेव पण्डित समाचार लेख्दासम्म विजयी भइसकेको बताइएको छ । तर औपचारिक घोषणा बाँकी रहेको छ । अन्य पदको मतगणना जारी नै रहेको छ । शनिवार गोपाल धर्मशालामा जारी मतदानमा संघमा ५०२७ मतदाता आबद्ध रहेकोमा ४३११ मतदान भएको थियो ।
यो विषयमा आफ्नो प्रतिक्रिया दिनुहोस् !