जनकपुरधाम, चैत १९ गते । वेपता भएर भारत बिहारकाे सीतामढीमा फेला परेकाे महाेतरी भंगहा नगरपालिकाकी बालिकाहरूलाई परिवारकाे जिम्मा लगाइएकाे छ ।
घाँस काट्न गएका बेला बेपत्ता भएकी भंगहा धर्मपुरकी ती ७ जनै बालिकाहरू सीतामढी रेलवे पुलिसले फेला पारेकाे थियाे ।
घाँस काट्न भनेर मंगलबार दिउँसो घरबाट निस्किएका उनीहरू सम्पर्कविहीन बनेका थिए। खोजीक्रममा भारतीय प्रहरीले उनीहरूलाई सीतामढी रेल्वे स्टेसनमा फेला पारी उद्धार गरेको हो।
त्यसपछि प्रक्रिया पूरा गरी ती ७ बालिका/युवतीलाई भारतीय प्रहरीले बुधबार राति साढे ९ बजे नेपाल प्रहरीलाई जिम्मा लगाएको थियो भने सहमति पश्चात् तिनीहरूलाई बिहिवार परिवारकाे जिम्मा लगाइएकाे छ ।भंगाहा नगरपालिका–८, धरमपुराका ११ वर्षीया अर्चना पासवान, १२ वर्षीया सीमा पासवान, १२ वर्षीया रञ्जना पासवान, १३ वर्षीया ज्योति पासवान, १३ वर्षीया रिया पासवान, १७ वर्षीया नगीना पासवान र २० वर्षीया अस्मिता पासवान वेपता भएकाे थियाे ।
किशोरीहरुको उद्धारमा पुगेका सशस्त्र प्रहरी निरीक्षक बिर्खबहादुर शाहीका अनुसार बिहारको सितामढीस्थित रेल्वे स्टेसनमा भारतीय प्रहरीले किशोरीलाई मंगलबार राति १० बजेको समयमा फेला पारेर सशस्त्र प्रहरीलाई खबर गरेको थियो ।
भारतीय प्रहरीसँग उनीहरुले ‘गायिका बन्न’ भारत गएको बताएपनि आफूहरुसँग भने उनीहरुले केही नबताएको उनले बताए । शाहीका अनुसार भारतीय गैरसरकारी संस्था चाइल्ड वेलफेर कमिटी (सीडब्लूसी)ले उनीहरुलाई बुधबार दिनभर काउन्सेलिङ गरेको थियो ।
सीडब्लूसीले आफ्नो जिम्मामा आएका किशोरीहरुलाई कम्तीमा पनि एक हप्ता वा एक महिना काउन्सेलिङ गरेर मात्रै परिवारको जिम्मा लगाउने नियम रहेका कारण राति अबेर उक्त संस्थालाई कन्भिन्स गरेर नेपाल ल्याइएको शाहीले बताए ।
पहिलो चरणको अनुसन्धानमा बालिका/युवतीलाई कसैले प्रलोभन देखाएर भारत लगेको संकेत पाइएको सशस्त्र प्रहरी (महोत्तरी) का एसपी सुरेश सापकोटाले बताए। अनुसन्धान क्रममा थप कुरा खुल्ने उनको भनाइ छ।
मंगलबार दिउँसो घाँस लिन गएका उनीहरू अबेर साँझसम्म घर नफर्केपछि घरपरिवारमा रुवाबासी भएको थियो भने गाउँले त्रसित भएका थिए। उनीहरूको खोजतलासमा नगरप्रमुख सञ्जीव साहसहित जनप्रतिनिधि, प्रहरी र स्थानीय बासिन्दा जुटेका थिए।
यो विषयमा आफ्नो प्रतिक्रिया दिनुहोस् !