जनकपुरधाम, चैत ५ गते । पत्रकारिता क्षेत्रमा ६५ वर्ष पार गरिसकेका श्रमजीवी पत्रकारहरुले चाँडै नै पेन्सन पाउने नेपाल पत्रकार महासंघका केन्द्रिय अध्यक्ष गोविन्द आचार्यले बताएका छन ।
बिहीवार नेपाल पत्रकार महासंघ धनुषा शाखाको शास्त्री सभा कक्षको उद्घाटन समारोहलाई सम्बोधन गर्दै अध्यक्ष आचार्यले पेशागत संरक्षणको उद्देश्यले पत्रकारहरुको वृति विकास अन्तर्गत ६५ वर्ष उमेर पार गरिसकेका पत्रकारहरुलाई पेन्सन उपलब्ध गराउने निर्देशिका बनाउने काम जारी रहेकोले अब चाँडै नै पाउने भने ।
उनले अहिले कल्याण कोषमा ६ करोड रकम जम्मा भएको र त्यसको व्याजवाट ६५ वर्ष पुरा भएका पत्रकारहरुलाई मासिक १० हजार पेन्सन दिने गरी निर्देशिका बनाउने काम जारी रहेको र चाँडै कार्यान्वयनमा आउने भने । कल्याण कोषवाट ज्येष्ठ पत्रकार, अपाङ्ग पत्रकार तथा द्वन्दमा परेका पत्रकारहरुलाई आर्थिक सहयोग प्रदान गरिने उनले बताए ।
श्रमजीवी पत्रकारहरुको हकहित र पेशागत संरक्षणका लागि कोष खडा गर्ने कार्य पनि अन्तिम चरणमा पुगेको बताए । उनले भने नेपाल सरकारबाट प्राप्त हुने लोक कल्याणकारी विज्ञापनबाट १० प्रतिशत रकम श्रमजीवी पत्रकारहरुको कल्याण कोषमा जम्मा हुनेछ । वार्षिक ४ अर्ब रुपैया बराबरको लोककल्याणकारी विज्ञापन वापत रकम छुटयाउने गरिन्छ त्यसको १० प्रतिशत अर्थात ४० करोड रुपैया कोषमा जम्मा हुने भएकोले पैसाको कुनै कमी नहुने उनले दाबी गरे ।
साथै अध्यक्ष आचार्यले महासंघको ईतिहासमा पहिलो पटक प्रत्यक्ष निर्वाचन प्रणालीमार्फत निर्वाचन हुन लागेकोमा खुशी लागेको भन्दै स्वतन्त्र पत्रकारिता र संस्थागत विकासका लागि कलम चलाउनुपर्नेमा जोड दिए ।
नेपाल पत्रकार महासंघ धनुषा शाखाका अध्यक्ष अनिल मिश्रको अध्यक्षतामा आयोजित कार्यक्रममा बरिष्ठ पत्रकार वि.एम.खनाल, मधेशी पत्रकार समाज धनुषाका अध्यक्ष सुभाष कर्ण, प्रदेश पत्रकार महासंघका कोषाध्यक्ष प्रविण साह, सल्लाहकार विरेन्द्र रमण, प्रेस मञ्चका केन्द्रीय उपाध्यक्ष राजेश कर्ण, प्रेस चौतारी धनुषाका अध्यक्ष अवधेश कामत, प्रेस सेन्टरका अध्यक्ष शैलेन्द्र महतो क्रान्ती, दलित पत्रकार संघका प्रदेश अध्यक्ष कैलाश दास सहितका वक्ताहरुले पत्रकारिताको हकहितका विषयमा आ–आफ्नो धारणा राखेका थिए ।
ती वक्ताहरुले अध्यक्ष मिश्रको दुई कार्यकाल सफल रहेको शुभकामना दिदैं भने केही वर्षअघिसम्म यहाँका पत्रकारलाई कतै उभ्नसम्म ठाउँ थिएन । तर अहिले संचार सुविधायुक्त तीन तल्ले भवन सहित सभा हल भएकोमा पत्रकारहरुको लागि गौरवको विषय रहेको छ ।
महासंघ धनुषाको नवनिर्मित दुई तले भवनको तल्लो तलामा व्यापारिक प्रयोजनका लागि पसल, पहिलो तलामा कार्यालय सहित समाचार लेखन तथा सम्प्रेषणका लागि ई प्रविधि सुविधा तथा माथिल्लो तलामा सभाकक्ष निर्माण गरिएको छ ।
वातानुकूलित सभाकक्षको निर्माण भएपछि महासंघलाई कुनैपनि कार्यक्रम आयोजना गर्नका लागि अन्यत्र जानुपर्ने बाध्यताको अन्त्य भएको छ । साथै अन्य संस्थाहरुले पनि कार्यक्रमका लागि सभाकक्षको प्रयोग गर्न मिल्ने भन्दै पत्रकारहरुको सफलताको रहेको कुरामा वक्ताहरुले जोड दिएका थिए ।
दुई तलाको भवन निर्माणमा विभिन्न दाताहरुले आर्थिक सहयोग गरेका छन् । भवन निर्माणमा कूल १ करोड रुपैयाँ खर्च भएको महासंघका अध्यक्ष अनिल मिश्रले जानकारी दिए ।
यो विषयमा आफ्नो प्रतिक्रिया दिनुहोस् !