जनकपुरधाम, फागुन २ गते । प्रदेश २ को अस्थायी राजधानी जनकपुरधाममा स्थानीय महिलाहरुको सीप तथा कलालाई प्रवद्र्धन गर्ने उद्देश्यले हस्तकला मेला तथा प्रदर्शनी शुरु भएको छ ।
महिला, बालबालिका तथा ज्येष्ठ नागरिक मन्त्रालय, राष्ट्रपति महिला उत्थान कार्यक्रम तथा नेपाल हस्तकला महासंघको संयुक्त आयोजनामा आइतवारदेखि शुरु भएको सो तीन दिने हस्तकला मेला तथा प्रदर्शनीमा हातद्वारा तयार पारिएका विभिन्न सामाग्रीहरु राखिएको छ ।
स्थानीय सीप, कला तथा संस्कृतिको संरक्षण सम्वद्र्धन गर्न महिला उद्यमीहरुले उत्पादन गरेका सामाग्रीहरुको बजारीकरण गर्न तथा घरेलु हस्तकला प्रति आकर्षित हस्तकला मेला तथा प्रदर्शनीको आयोजना गरिएको नेपाल हस्तकला महासंघका उपाध्यक्ष सनम शाक्यले जानकारी दिएकी छिन ।
जनकपुरधामको गोपाल धर्मशालामा आयोजना गरिएको सो मेला तथा प्रदर्शनीमा प्रदेशका ८ वटै जिल्लाका महिला उद्यमीको ५० भन्दा बढी हस्तकला सामाग्रीको स्टल राखिएको छ । २५ हजारभन्दाको सहभागिता गराउने लक्ष्य राखिएको सो मेलामा अवलोकनका निशुल्क गरिएको छ ।
प्रदर्शनीमा मिथिला आर्ट, माटाका भाँडा, लाहाका गरगहनाहरु, बांसबाट बनाइएका कलात्मक सामग्री, प्राकृतिक रेसाका वस्तुहरु, चाँदीका गरगहना, फेल्टजन्य वस्तु, पश्मिना, ऊनी तथा सुतीजन्य वस्तु, हाते कागजजन्य वस्तुहरु स्टल राखिएको छ ।
सो कार्यक्रमको विधिवत रुपमा महिला बालबालिका तथा ज्येष्ठ नागरिक मन्त्री जुलीकुमारी महतोले उदघाटन गरेकी छिन ।
उद्घाटन कार्यक्रमलाई सम्बोधन गर्दै मन्त्री महतोले भनिन् महिला उद्यमीहरुको प्रोत्साहन र मिथिला सस्कृतिसँग जोडिएर बनाइएका हस्तकला सामाग्रीको बजारीकरणका लागि मन्त्रालयले विभिन्न योजनाहरु ल्याएको छ जसमध्ये यी मेला तथा प्रदर्शनी पनि एक हुन ।
उनले मिथिला चित्रकलाको विश्वमै छुट्टै पहिचान रहेपनि बजारीकरणको आभावमा लोपान्मुख अवस्थामा पुगेकोले अब आधुनिकीकरण कसरी गर्ने र त्यसको बजारीकरणका लागि आगामी दिनमा विभिन्न कार्यक्रम आयोजना गरिने बताईन ।
यो विषयमा आफ्नो प्रतिक्रिया दिनुहोस् !