जनकपुरधाम, माघ १६ गते । धनुषाको विदेह नगरपालिकाका मेयर बेचन दासले अदालतको आदेशलाई लत्याउंदै सडक विस्तारको क्रममा अधिग्रहणको नाममा मापदण्ड विपरित दादागिरी शैलीमा स्थानीयको जग्गा अतिक्रमण गर्न खोजेको आरोप लगाइएको छ ।
हुलाकी राजमार्ग आयोजनाको निर्माणाधीन विरेन्द्र बजार—महिनाथपुर सडक खण्ड अन्तर्गत विदेह नगरपालिकाका मेयर दासले वडा नम्बर ६ स्थित तिनकौरिया बजारमा पर्ने गिद्धा बेला स्थित श्री जनता नमूना माध्यमिक विद्यालय र एक वडाध्यक्षको जग्गा जोगाउन बलजफ्ती स्थानीयको निजी जग्गा अतिक्रमण गर्न लागेको हो ।
वर्षेणी लाखौ रुपैयामा बजारका लागि ठेक्का लगाइदै आएको विद्यालय र वडा नम्बर ५ का अध्यक्ष विजय यादवको पनि जग्गा पनि अधिग्रहणमा पर्न जाँदा मेयर दासले सो जग्गा बचाउन नाप नक्सा विपरित सडक नै टेढो हुने गरी घुमाएर एक दर्जनभन्दा बढी स्थानीयवासीको जग्गा अतिक्रमण हुने गरी अधिग्रहण गर्न लाग्दा विवाद उत्पन्न भएको छ ।
सो सडक विवाद करीब दुई वर्षदेखि चल्दै आएको छ । मेयरले विद्यालय र वडाध्यक्षको जग्गा बचाउन मापदण्ड स्थानीयको जग्गा अधिग्रहण गर्न खोज्दा पिडित स्थानीयले उच्च अदालतमा मुद्दा दिंदा अन्तरिम आदेशपछि निर्माण कार्य रोकियो । त्यसपछि दुवै पक्षको सहमति पश्चात निर्माण कार्य अघि बढाइयो तर मेयरको दादागिरी कायमै रहेपछि स्थानीयले पुनः उच्च अदालतमा मुद्दा हाले ।
त्यसपछि अदालतले मापदण्ड अनुसार काम गर्न अन्तरिम आदेश गरेपछि मेयर दासले सो आदेशलाई बेवास्ता गर्दै पुनः विद्यालय र वडाध्यक्षको जग्गा बचाउन अधिग्रहणको नाममा अतिक्रमण गर्न खोजेपछि विवाद बढदै गएपनि सडक निर्माण कार्य अनिश्चित बन्दै गएको छ ।
यस्तो छ मेयरको दादागिरी
मेयर दासले मापदण्ड विपरित जग्गा अधिग्रहण खोज्दा स्थानीयले मेयर सहितका लागि विपक्षी बनाई २०७५ सालमा उच्च अदालतमा हालेपछि विवाद समाधान गरी मापदण्ड अनुसार सडक निर्माण गर्न विपक्षीहरुको नाम अन्तरिम आदेश जारी गरिएको छ ।
अदालतको आदेशपछि मापदण्ड अनुसार ३० मीटर विस्तार गर्दा बजार क्षेत्र घना वस्ती भएको कारण बढी क्षति हुन सक्ने दृष्टिगत गर्दै मूल सडकको केन्द्रलाई आधार मानी ८÷८ मीटर दुवैतर्फ जग्गा अधिग्रहण गर्ने सहमति भएको थियो । सो सहमति विपरित एकतर्फी रुपमा स्थानीयको जग्गा अधिग्रहण खोज्दा स्थानीयले पुनः उच्च अदालतमा मुद्दा हाले ।
सो मुद्दामा उच्च अदालत जनकपुरका न्यायधिशद्वय बालकृष्ण उप्रेती र ध्रुवराज नन्दको संयुक्त इजलाशबाट पुनः मापदण्ड अनुसार सडक निर्माण गर्न/गराउन विपक्षीहरुको नाममा २०७६ जेठ १४ गते अन्तरिम आदेश जारी गरियो । तर मेयर दासले सो आदेशलाई लत्याउंदै आफ्नो उपस्थितिमा लठैत लगाएर बलजफ्ती मापदण्ड विपरित आफूहरुको घर पर्खाल भत्काएको पिडीत स्थानीयहरुले बताएका छन ।
आफूहरुको विरोधले गर्दा महिनौदेखि सडक निर्माण कार्य अवरुद्ध रहेपछि समयमै सडक निर्माण कार्य सम्पन्न गर्न सम्बन्धित निकायबाट दबाव पर्न थालेपछि मेयर दासले विद्यालय र वडाध्यक्षको जग्गा बचाउन लागेपछि सम्पूर्ण स्थानीय नै उनको विरोधमा उत्रेको उनले बताए ।
विवादले निर्माण अनिश्चित
कुल ३२ किलोमीटर निर्माण हुने भनिएको सो सडक खण्डमा सम्पूर्ण निर्माण कार्य पुरा भएपनि मेयर दासको मनपरीको कारण तिनकौरियामा २ सय मीटर निर्माण कार्य हुन नसक्दा आयोजना अधुरो हुन गएको छ । मेयर दासले आफ्नो पदीय दायित्व विपरित कार्य गर्न खोजेकामा स्थानीयले प्रतिकार गर्नेसम्मको अवस्थामा मनस्थितिमा पुगिसकेको छ ।
मेयरले आफ्नो पदीय दायित्व पुरा गर्नुपर्नेमा सो नगरी विद्यालय र वडाअध्यक्षको जग्गा बचाउन पटक पटक अदालतको आदेश र स्थानीयसंगको सहमतिलाई बेवास्ता गर्दै मापदण्ड विपरित अधिग्रहणको नाममा जग्गा अतिक्रमण गर्न खोजेको पिडीत एक स्थानीयले आरोप लगाए ।
विद्यालय प्रधानाध्यापक पवन मण्डल र वडाध्यक्ष विजयले जग्गा अधिग्रहणले बजार ठेक्काबाट आउने लाखौ रकम गुम्ने डरले मेयरलाई प्रभावमा पारेको र तिनीहरुकै अनुसार मापदण्ड विपरित जग्गा अधिग्रहण गर्न लाग्दा स्थानीयवासी मात्र होइन स्थानीय वडाध्यक्ष समेतले विरोध जनाएका छन ।
स्थानीय वडा नम्बर ६ का अध्यक्ष जयराम मण्डलले भने मापदण्ड विपरित कार्य हुनु गलत हो, अदालतले जे आदेश गरेको छ त्यही अनुसार काम हुनु परयो । अदालतको आदेश र मापदण्ड अनुसार कार्य अघि नबढाइए कतई बर्दास्त हुँदैन त्यसमा हाम्रो असहमति हुनेछ ।
स्थानीयको आरोपप्रति मेयर दासले संचारकर्मीको जिज्ञासामा पन्छिदै भने आफू न कसैको जग्गा बचाउन खोजेको छु न कसैको घर भत्काएको छु । आफूमाथि लगाइएको आरोप गलत हो ।
उनले भने आफू पनि अदालतको आदेश र मापदण्ड अनुसार काम हुनुपर्ने पक्षमा छु । सोही अनुसार काम गर्न खोज्दा केही स्थानीयको जग्गा अधिग्रहणमा पर्दा तिनीहरुको विरोधले विरोध गरेका हुन ।
स्थानीयले हुलाकी राजमार्ग योजना कार्यालय, ठेक्केदार पप्पु जेभी, नगरपालिकाका मेयर बेचन दास, वडा नं. ६ का अध्यक्ष स्थानीय जिरेखन मण्डल, लछु मण्डल केवट र सभापति मण्डल केवटलाई विपक्षी बनाई उच्च अदालतमा मुद्दा हालेका थिए । अदालतको आदेशलाई अव्हेलना गर्दै मेयर दासले बलजफ्ती पुनः मापदण्ड विपरित स्थानीयको जग्गा अधिग्रहण खोज्दा स्थानीयले उनी विरुद्ध अव्हेलनाको मुद्दा उच्च अदालतमा दर्ता गराएका छन ।
मेयर दास निर्वाचित भएदेखि नै विवादित रहदै आएका छन । कहिले आफ्ना जातिय र नातेदारलाई नगरपालिकामा जागिर दिएकोमा, त कहिले मदिरा पसलेसंग भुक्तानीको नाममा कमीशन मांग्दा, केही दिन दुर्गापुजामा केटी नचाउंदै सेल्फी लिएको लगायतका घटनामा उनी विवादित बन्दै आएका छन ।
यो विषयमा आफ्नो प्रतिक्रिया दिनुहोस् !