जनकपुरधाम, माघ १६ गते । बजेट भएपनि अधिकांश स्थानीय तहको लापरवाहीका कारण पोषण कार्यक्रमलाई प्रभावकारी हुन नसकेको जनाइएको छ ।
शुक्रवार सिसानद्वारा आयोजित संचारकर्मीहरुसंको अन्तरक्रिया पोषण कार्याक्रमलाई प्रभावकारी बनाउन संघ सरकारद्वारा प्रत्येक स्थानीय तहलाई ३० देखि ३५ लाख रुपैयासम्म अनुदान दिइने गरिएको छ तर प्रदेश २ का अधिकांश स्थानीय तहले कार्यक्रम नै संचालन गर्न नसक्दा बजेट फ्रिज हुने गरेको बताइयो ।
कार्यक्रममा बहुक्षेत्रिय पोषण योजना प्रदेश २ का हेमन्त झाले कार्यक्रम बारे जानकारी दिदैं भने कुनैपनि बालबालिका कुपोषित नहोस उद्देश्यका साथ सरकारले स्थानीय तहलाई लाखौ रुपैया पठाउने गरेको छ तर अधिकांश स्थानीय तहले कार्यक्रम नै संचालन गर्न नसकेको र रकम खर्च नसकेको अनुगमनमा देखिएको छ ।
उनले भने महिला तथा बालबालिकाको विकास तथा पोषित बनाउन पैसाको कमी छैन तर स्थानीय तहहरुले मात्र सडक र नाला लगायतका विकास निर्माणमा ध्यान पुरयाएको कारण पैसा हुँदाहुदै बहुक्षेत्रिय पोषण योजना कार्यक्रम प्रभावकारी हुन सकेको छैन ।
झाले भने केन्द्र सरकारले दिएको बजेटमा प्रदेश सरकार र स्थानीय तहले समेत थप बजेटको व्यवस्था गरिदिएकोमा पोषण कार्यक्रम अझै प्रभावित हुन सक्नेछ । तर त्यसका लागि काम गर्ने मानसिकतामा परिवर्तन ल्याउनु जरुरी छ ।
यसका साथै झाले बालबालिकालाई कुपोषणबाट जोगाउन सरकारकै भर नपरी आम जनता स्वयंले आफ्नो व्यवहारमा समेत परिवर्तन ल्याउन जरुरी रहेको बताउंदै पैसा नलाग्ने समय समयमा साबून पानीले हात धुने, आमाले शिशुलाई स्तनपान गराउनुपर्ने, हरियो सागसब्जी बढी खाने र सरसफाई लगायत कुरामा सबैले ध्यान पुरयाउन जरुरी छ भने ।
पोषण क्षेत्रमा लगानी नभए देशकै ग्राहस्थ उत्पादनमा कमी आउने जानकारी दिदै पोषणमा लगानी गरिए १६ गुणा बढी प्रतिफल हाशिल गर्न सकिने बताए । एक तथ्यांकका अनुसार कुपोषणका कारण कुल ग्राहस्थ उत्पादनमा ११ प्रतिशतले कमी आउने जानकारी समेत उनले दिए ।
कार्यक्रममा सिसानकी सुधा कर्णले संस्था काम बारे जानकारी दिदै भनिन देशको सर्वांगिन विकासका लागि मातृ मृत्यु दर तथा शिशु मृत्यु दर कमी ल्याउन र बालबालिकालाई कुपोषित हुनबाट जोगाउन बहुक्षेत्रीय पोषण कार्यक्रमलाई प्रभावकारी बनाउन पुर्ण कार्यान्वयनमा ल्याउन जरुरी रहेको छ ।
सिसानले बहुक्षेत्रिय पोषण योजनाका लागि विभिन्न कार्यक्रमहरु संचालन गर्दै आएको छ । सो संस्थाले खासगरी बालबालिकालाई कुपोषित हुनबाट जोगाउन सम्बन्धित निकायको सहकार्यमा कार्य गर्दै आएको छ ।
यो विषयमा आफ्नो प्रतिक्रिया दिनुहोस् !