जनकपुरधाम, माघ १५ गते । धनुषामा एक मदिरा उद्योगी (डिस्ट्रलरी संचालक) को हत्या भएको छ ।
क्षिरेश्वरनाथ नगरपालिका ७ महेन्द्रनगरस्थित क्षिरेश्वर डिष्ट्रिलरी इन्डस्ट्रिजका सञ्चालक उदयपुर जिल्ला त्रियुगा नगरपालिका ७ चुओर निवासी ५१ वर्षिय प्रमोद रेग्मीको हत्या भएको जिल्ला प्रहरी कार्यालय धनुषाले जनाएको छ ।
मंगलवार बिहान आफ्नो घरबाट उद्योग आएका रेग्मीको शव रक्ताम्य अवस्थामा बिहीवार बिहान ९ बजे उद्योगको प्राङ्गणमा रहेको कोठाभित्र फेला परेको हो । प्रहरीका अनुसार टाउकोमा गहिरो चोट लागेको र शरीरबाट अत्यधिक रगत बगेको छ ।
रेग्मीका आफन्त विनोद पाण्डेले संचारकर्मीसँग कुरा गर्दै भने बुधवार सांझ साथी भाईसंग उद्योगमै बसेर मदिरा सेवन गरेका थिए । त्यसपछि उनले राति करीब १० बजे आफ्ना छोराछोरी सँग फोनमा कुराकानी समेत गरेका थिए । बिहान उठदा उनी मृत अवस्थामा फेला परेका हुन ।
ईलाका प्रहरी कार्यालय महेन्द्रनगरका अनुसार रेग्मीको टाउकोमा ७ इन्च लामो २ इन्च गहिरो घाउ देखिएपनि घटना शंकास्पद देखिएको छ । ईप्रका प्रमुख दिपक रायले भने मृतकको शरीरमा घाउ देखिएपनि शवको प्रकृति हेर्दा हत्या भएको देखिएपनि घटना शंकास्पद रहेको छ ।
प्रहरीले शवलाई पोष्टमार्टमका लागि प्रादेशिक अस्पतालमा पठाइएको छ भने घटनाको अनुसन्धानको क्रममा चार जनालाई प्रहरीले नियन्त्रणमा समेत लिएको छ ।
मृतक रेग्मीसहित चारजना मिलेर महेन्द्रनगरमा डिष्ट्रिलरी सञ्चालन गरेका छन् । उनी डिष्टिलरीका निर्देशकको रुपमा काम गर्दै आएको थियो ।
यो विषयमा आफ्नो प्रतिक्रिया दिनुहोस् !