जनकपुरधाम, माघ १४ गते । देशका विभिन्न स्थान सहित प्रदेश २ मा पनि बुधवारदेखि विधिवत रुपमा कोरोना विरुद्ध कोभिड खोप अभियान शुरु भएको छ ।
पहिलो चरणमा प्रदेशका धनुषाको जनकपुरधाम, पर्साको विरगञ्ज र सप्तरीको राजविराजबाट एकैसाथ अौपचारिक कार्यक्रम गरी खोप दिने अभियान शुरु भएको छ । जनकपुरधाममा प्रादेशिक अस्पताल, विरगंजमा नारायणी उपक्षेत्रिय अस्पताल र राजविराजमा गजेन्द्रनारायण सिंह अस्पतालबाट खोप दिने अभियानकाे कार्यक्रम गरिएकाे हाे ।
प्रदेशमा पहिलो खोप प्रदेश सरकारका आन्तरिक मामिला तथा कानून मन्त्री ज्ञानेन्द्र कुमार यादवलाई लगाएर प्रादेशिक अस्पतालबाट अभियानको शुरुवात गरिएको छ भने विरगञ्जमा नर्स हेमा थापा र राजविराजमा स्टाफ नर्स सुनिता यादवलाई पहिलो खोप लगाइएको हो ।
खोपप्रति कुनै किसिमको डर भयत्रास नहोस भन्ने उद्देश्यका साथ कोरोना संक्रमित भइसकेका मन्त्री यादवले प्रदेशमा पहिलो खोप लगाएर खोपका शुरुवात गरेका हुन । मन्त्री यादवले पहिलो खोप लगाएकोमा व्यापक आलोचना समेत भइरहेको छ ।
प्रादेशिक अस्पतालमा कानून मन्त्री यादवपछि अस्पतालका नर्स इन्चार्ज सन्ध्या दास र अस्पतालका मेसु डा. प्रमोद यादव, शववाहन चालक राजकुमार यादव र स्वास्थ्यकर्मी विनयकुमार गोइतले कोरोना विरुद्धको भ्याक्सिन लिएका छन् भने त्यसपछि बाँकी चिकित्सक, स्वास्थयकर्मी, सरसफाईकर्मीहरु, शव वाहन चालकले भ्याक्सिन लिन सुरु गरेका छन् ।
भ्याक्सिन लिएपछि मन्त्री यादवले भ्याक्सिन लिनुपूर्व र लिएपछि शरिरमा कुनै किसिमको फरक नपरेको बताए । उनले भ्याक्सिन विरुद्धको विभिन्न अफवाहरु रहेकोमा त्यसलाई चिर्न आफुले पहिले भ्याक्सिन लिएको बताए । पहिलो चरणमा प्रदेशका धनुषा, पर्सा र सप्तरी सहितका तीन जिल्लाबाट खोपको शुरुवात गरिएको भन्दै मन्त्री यादवले प्रत्येक जिल्लाबाट पनि खोप दिइने व्यवस्था मिलाउने तयारी भइरहेको र यस प्रदेशको ११ स्थानकाे अस्पपतालबाट खोप दिइने व्यवस्था गरिएकाे मन्त्री यादवले बताए ।
उनले भ्याक्सिन ल्याउने जिम्मा संघ सरकारको रहेकोले यदि संघ सरकार त्यसबाट पञ्छिए प्रदेश सरकार आफै व्यवस्था मिलाएर आम जनताका लागि चाँडै प्रदेश सरकार भ्याक्सिनको व्यवस्था गर्ने बताए ।
प्रादेशिक अस्पतालमा पहिलो चरणमा अस्पतालका चिकित्सक, स्वास्थ्यकर्मी, सफाईकर्मी र शववाहन चालक सहितका २ सय २५ जनालाई दिइने छ भने त्यसपछि जिल्लाका अन्य स्वास्थ्य संस्था, निजी अस्पतालका स्वास्थ्यकर्मीहरुलाई दिइने जानकारी अस्पलतालका मेसु डा. प्रमोद यादवले जानकारी दिएका छन ।
खोप साइड इफेक्ट रहित
कार्यक्रमको उद्घाटन सत्रमा बोल्दै कोभिड अस्पतालका प्रमुख एवं राष्ट्रिय खोप सल्लाहकार समितिका सदस्य डा. जामुन सिंहले यो खोप सबै भन्दा उत्कृष्ट रहेको बताए ।
अहिलेसम्म निर्यातकर्ता भारतमा कुनै खोपमा कुनै साइड इफेक्ट नदेखिएकोले खोप लगाउन कुनै भयत्रास मनमा नराख्न आग्रह गर्दै उनले यो खोप पुर्ण रुपमा सुरक्षित रहेको आश्वास्त गर्नु भयो ।
डा. सिंहले भने खोप बारे जानकारी जानकारी दिदैं भने कुनैपनि खोप पहिलो चरणमा बालबालिका अर्थात १८ वर्षभन्दा कम उमेर र गर्भवती महिला लगायतलाई नदिने भएकोले यो खोप पनि तिनीहरुलाई दिइने छैन ।
उनले डब्लुचएओले यस भ्याक्सिनलाई आपतकालिन रुपमा प्रयोग गर्न सबैभन्दा पहिले मान्यता दिएको र यो भ्याक्सिन बनाउने कम्पनी विश्वमा आवश्यक पर्ने ६० प्रतिशत खोपको आपुर्ति गर्ने गरेकोले यसमा विश्वास गर्न सबैसँग आग्रह गरे ।
प्रदेशमा ३४ हजारलाई खोप दिइने तयारी
पहिलो चरणको लागि यस प्रदेशमा ३४ हजार ८ सय ४ डोज कोरोना भ्याक्सिन आएकोमा हालसम्म ३१ हजार भन्दा बढीको नाम संकलन गरिएको स्वास्थ्य निर्देशनालयका निमित्त निर्देशक विजय झाले बताए ।
पहिलो चरणमा भ्याक्सिन लिनेमा २३ हजार ७१ जना चिकित्सक तथा नर्सहरुको नाम दर्ता गरिएको छ । सरकारी अस्पतालका ११ हजार ७ सय ३७ र निजी अस्पतालका ११ हजार ३ सय ३४ जनाको नाम दर्ता गरिएको छ । त्यस्तै ७ हजार २७ महिला स्वयंसेवीका र १ हजार २ सय ४ जना सरसफाईकर्मीको नाम भ्याक्सिन लिनेको नाम दर्ता गरिएको झाले बताए ।
प्रदेश सरकारले सबभन्दा बढि धनुषामा ९ हजार १ सय ८२, पर्सामा ४ हजार ९ सय ७१, सर्लाहीमा ४ हजार ७ सय ७२, सिरहामा ३ हजार ९ सय ३०, सप्तरीमा ३ हजार ७ सय ५४, रौतहटमा ३ हजार ६ सय ९, महोत्तरीमा २ हजार १ सय ९१ र बारामा २ हजार ३ सय ९५ डोज खोप लगाउने बताइएको छ ।
यो विषयमा आफ्नो प्रतिक्रिया दिनुहोस् !