जनकपुरधाम, पुष २५ गते । नेपाली कांग्रेसले प्रधानमन्त्री केपी शर्मा ओलीले गरेको प्रतिनिधि सभा विघटन विरुद्ध जनकपुरधाममा वृहत प्रदर्शन गरेका छन ।
शनिवार पुर्व निर्धारित कार्यक्रम अनुसार व्यक्तिगत स्वार्थ पुरा गर्न प्रतिनिधि सभा विघटन गरेको भन्दै नेपाली कांग्रेसले जनकपुरधाम सहित प्रदेश २ का निर्वाचन क्षेत्रहरुमा रैली सहितको विरोध प्रदर्शन गरेका हुन ।
जनकपुरधाममा पार्टी कार्यालयबाट निस्केको विरोध रैली नगरको विभिन्न भागको परिक्रमा गर्दै जनक चोकमा पुगी कोण सभामा परिणत भएको थियो । रैलीमा सहभागीहरुले प्रतिनिधि सभा पुर्नस्थापित गर, प्रतिगमनकारी ओली मुर्दाबाद, लोकतान्त्रिक शक्ति जिन्दाबाद लगायतका नारा लगाएका थिए ।
सो कोण सभालाई सम्बोधन गर्दै वक्ताहरुले संसद विघटन गरि प्रधानमन्त्री केपी शर्मा ओलीले अलोकतान्त्रिक, अधिनायकवादी र निरंकुश चरित्र प्रदर्शन गरेको आरोप लगाउंदै यसको विरुद्ध लाग्न बताएका थिए । उनीहरूले ओलीको यो असंवैधानिक कदम लोकतन्त्र र संविधानको हत्या गरेको आरोप लगाउंदै संघीयता र संविधानलाई बचाउन ओली विरुद्धको कांग्रेसको आन्दोलनलाई सशक्त बनाउन सहयोग गर्न आग्रह गरे ।
संघीयता धरापमा पारेर मुलुकलाई अस्थिरतातर्फ धकेल्ने ओलीको प्रयासलाई असफल पार्न नेपाली कांग्रेस आन्दोलनलाई शसक्त बनाएर अघि बढने चेतावनी समेत उनीहरुले दिए ।
नेता शिवचन्द्र रायको अध्यक्षतामा सम्पन्न सो कोण सभालाई केन्द्रिय सदस्य मिनाक्षी झा, क्षेत्रिय सभापति कन्हैया कर्ण, नेपाल तरुण दल धनुषाका उपाध्यक्ष राकेश विक्रम, महिला संघका केन्द्रिय सदस्य निलमदेवी कर्ण, नगर अध्यक्ष मनोज साह लगायतका नेताहरुले सम्बोधन गरेका थिए ।
नेपाली कांग्रेसले धनुषा निर्वाचन क्षेत्र नम्बर १ को (क) मा क्षेत्रिय सभापति दीपनारायण यादव, क्षेत्र नम्बर १ को (ख) मा केन्द्रिय सदस्य आनन्द प्रसाद ढुङ्गाना, क्षेत्र नम्बर २ को (क) मा प्रदेशसभा सदस्यका उम्मेदवार राजा गोइत,२ को (ख) मा केन्द्रिय सदस्य रामकृष्ण यादव, क्षेत्र नम्बर ३ को (क) मा प्रदेशसभा सदस्य रामसरोज यादवको नेतृत्वमा विरोध प्रदर्शन गरिएको थियो ।
त्यस्तै निर्वाचन क्षेत्र नं. ३ को (ख) मा केन्द्रिय सदस्य मिनाक्षी झा एवं क्षेत्रिय सभापति कन्हैया लाल कर्ण र क्षेत्र नम्बर ४ को (क) मा प्रदेशसभा सदस्यका उम्मेदवार बासुलाल महतो एवं ४ को (ख) मा केन्द्रिय सदस्य महेन्द्र यादवको नेतृत्वमा विरोध प्रदर्शन गरिएको हो ।
यो विषयमा आफ्नो प्रतिक्रिया दिनुहोस् !