जनकपुरधाम, कात्तिक २७ गते । कोरोना भाइरस महामारी नियन्त्रणका लागि प्रदेश २ सरकारले तेस्रो चरणको तयारी थालेको छ ।
मुख्यमन्त्री तथा मन्त्रीपरिषदको कार्यालयमा बिहीवार सम्पन्न प्रादेशिक कोरोना संकट व्यवस्थान समिति (पिसिसिएमसी)को बैठकले कोरोना महामारीको वर्तमान अवस्था, विगतमा भए गरेको कामकाजको समीक्षा र अगामी रणनीति बारे छलफल गर्दै तेस्रो चरणको तयारी थाल्ने निष्कर्ष निकालेको हो ।
तेस्रो चरणको तयारी अन्तर्गत बैठबबाट अस्पतालहरुमा उपचार प्रणालीलाई थप सुदृढ बनाउन प्रदेश भरिका महत्वपूर्ण ६ वटै अस्पतालमा २५ बेडका दरले जम्मा १ सय ५० बेडको उच्च निर्भरता कक्ष (एचडियु) निर्माण गर्ने निर्णय गरिएको छ ।
यसका साथै प्रदेश सरकारको आर्थिक सहयोगमा विभिन्न अस्पतालहरुले खरिद गरेको भेन्टिलेटरहरुलाई यथाशिघ्र संचालनमा ल्याउन आवश्यक दक्ष जनशक्ति व्यवस्थापन गर्ने निर्णय समेत गरिएको कुरा बैठक पश्चात लोकपुकारसँग कुरा गर्दै सरकारका प्रवक्ता एवं आन्तरिक मामिला तथा कानून मन्त्री ज्ञानेन्द यादवले बताएका छन ।
बैठकमा समाजिक विकास मन्त्रालय आपूर्ति महाशाखाका निर्देशक डा. प्रमोद यादवले महामारी विरुद्धको तेस्रो चरणको तैयारी स्वरुप पचास हजार भिटिएम र रिएजेन्ट खरिद गरिसकेको, पिसिआर ल्याव संचालन गर्न बाँकी रहेको चार जिल्लामा यसै साता देखी ल्याव संचालनमा ल्याउने तयारी भइरहेको जानकारी गराएका थिए ।
मुख्यमन्त्री लालबाबु राउतको अध्यक्षतामा सम्पन्न सो बैठकमा निकट भविष्यमा आउन लागेको कोरोना विरुद्धको भ्याक्सिनलाई व्यवस्थापन गर्न तीन सदस्यीय भ्याक्सिन व्यवस्थापन समिति गठन समेत गरेको छ ।
बैठकबाट संक्रामक रोग विशेषज्ञ एवं विज्ञ समूहका सदस्य डा. गरिब नाथ ठाकुरको संयोजकत्वमा गठित उक्त समितिमा आपूर्ति महाशाखाका निर्देशक डा. प्रमोद यादव र स्वास्थ्य निर्देशनालयका निर्देशकमा विजय झालार्य चयन गरिएको जनाइएको छ ।
यो विषयमा आफ्नो प्रतिक्रिया दिनुहोस् !