जनकपुरधाम, कात्तिक १९ गते । महोत्तरीको मटिहानी नगरपालिकामा दुर्गा पूजाको विषयमा दुई पक्षबीच भएको झडप राजनीतिक रुप लिंदै गएको छ ।
विजया दशर्मीका कात्तिक १० गते दिन मटिहानी नगरपालिका मेयर हरिप्रसाद मण्डल र नेकपाका नेता विजय चौधरी समूहबीच भएको दोहरो झडपमा सम्बन्धित राजनीतिकका प्रतिनिधिहरुले प्रेस विज्ञप्ति मार्फत आ आफ्ना धारणा सार्वजनिक गर्दै आएका छन ।
यसैक्रममा पिपरा गाउँपालिकाका अध्यक्ष विक्रम चौधरीले जिल्ला समन्वय समितिद्वारा जारी प्रेस विज्ञप्तिमा भूलवश हस्ताक्षर भएको भन्दै मेयर मण्डलबाट भएको संघातिक आक्रमण घटनाको छानबीन गर्न मांग गरेको छ ।
उनले बुधवार एक प्रेस विज्ञप्ति जारी गरी मंगलवार जिससद्वारा केही स्थानीय तहको संयुक्त बैठकबाट जिसस संयोजक सुरेश प्रसाद सिंहद्वारा घटनालाई उल्टो बनाई निकालिएको प्रेस विज्ञप्तिमा भूलवश हस्ताक्षर हुन गएको बताएका छन ।
अध्यक्ष चौधरीले विजय चौधरी, जितेन्द्र चौधरी र गणेश प्रसाद साहमाथि भएको संघातिक आक्रमणको ठीक उल्टो प्रस्तुत गरी प्रकाशित विज्ञप्तिमा मेरो विमति रहेको बताउंदै कुनैपनि घटनाको सत्य तथ्य छानबीनबाट नै हुने भएकोले त्यसलाई नै रोक्ने वातावरण बनाउने कुरा प्रति मेरो विमति रहेको जनाएका छन ।
त्यसैगरी सोही गाउँपालिकाका उपाध्यक्ष ननुकुमारी दासले मटिहानी नगरपालिकाका मेयर मण्डलमाथि भएको संघातिक आक्रमणको एक प्रेस विज्ञप्ति जारी घोर भत्र्सना गरेको छ ।
उनले विज्ञप्तिमा भनेकी छिन सामाजिक सद्भाव बिगार्ने उद्देश्यले मेयर मण्डल र दुर्गा पुजा समितिका अध्यक्ष लगायतका सदस्यहरुमाथि गरिएको गाली गलौज र आक्रमण घटनाको घोर भत्र्सना गर्दछु ।
साथै उपाध्यक्ष दासले घटनामा संलग्न अपराधीहरुलाई तत्काल पक्राउ गरी कारवाही प्रक्रिया अघि बढाउन स्थानीय प्रशासनसँग मांग गर्दै दोषीलाई कारवाही नभए जिल्लामा उत्पन्न परिस्थितिको जिम्मेवार स्थानीय प्रशासन नै हुने चेतावनी समेत दिएकी छिन ।
कात्तिक १० गतेका दिन मटिहानी नगरपालिका ७ मा आयोजित दुर्गा पुजा स्थल नजिकै दुर्गा पुजा समितिमा आबद्ध मेयर मण्डल र चौधरी पक्षका व्यक्तिहरुबीच दोहरो झडप भएको थियो । सो झडपमा परी दुवै पक्षबाट आधा दर्जनभन्दा बढी व्यक्ति घाइते भएको थिए ।
यो विषयमा आफ्नो प्रतिक्रिया दिनुहोस् !