मलंगवा, कात्तिक १२ गते । सर्लाहीका ईश्वरपुर नगरपालिका ९ वडाध्यक्षले चोरी आरोपमा एक युवकलाई मरनासन्न हुने गरी कुटपिट गरी घाइते बनाएका छन ।
वडाध्यक्ष अमिरीलाल साह सहित स्थानीय रामचन्द्र सुडी र भरत महतो सुडी लगायतका व्यक्तिहरुले सोमवार मेला हेर्न गएका स्थानीय युवकलाई निर्घात रुपमा कुटपिट गरी घाइते बनाएको आरोप लगाइएको छ ।
सोमवार राति रामनगरमा आयोजित दुर्गा पुजाको मेलामा आयोजित नाच हेर्न गएका युवक १९ वर्षिय गोविन्द माझीलाई चोरीको आरोप लगाउंदै एउटा रुखमा हातखुट्टा बाँधेर मरनासन्न गरी कुटपिट गरेको स्थानीय पच्चु माझीले जानकारी दिएका छन ।
प्रहरीको सहयोगमा कुटपिटबाट गम्भीर घाइते युवक भएका निज युवकको उपचार बयलबाँसस्थित पोलिक्लिनीकमा उपचार भईरहेको छ ।
घटना बारे जानकारी दिदै पिडीत युवक गोविन्दले गाउँमा आफू नाच हेर्न गएको बेला स्थानीय सुरेश महतोको खेतमा शौच गर्न गएको क्रममा जग्गाधनी सुरेशका छोरा गौरी महतोले चोर हो भन्दै पक्राउ गरेर कुटपिट गरी नियन्त्रणमा लिएका थिए ।
त्यसको भोली पल्ट मंगलवार गाउँ समाजमा घटना मिलाउनुको सट्टा वडाध्यक्ष अमिरी साह लगायतका व्यक्तिहरुले आफूलाई रुखमा बाँधेर लट्ठीले मात्र कुटेनन् तिनीहरुले पैतालामा सुईं घोंपेर र करेन्ट समेत लगाएर निर्घात रुपमा मरनासन्न हुने गरी कुटपिट गरेको हो ।
उनले भने आफूलाई मात्र होइन आफूलाई बचाउन गएका मेरी आमालाई समेत वडाध्यक्ष लगायतका व्यक्तिहरुले कुटपिट गरियो ।
यता, घटना बारे वडाध्यक्ष अमिरी साहले कुटपिट गरेको स्वीकार गर्दै भने सोमबार राती नाच चलिरहेको बेला सुरेश महतोको घरमा चोरी गर्न गएको बेला गोविन्द पक्राउ गरिएको थियो । उनले भने तीन महिना भित्र भएको १४ वटा चोरीको घटनामा समेत उनको संलग्ना रहेको छ । सोही रिसमा कुटपिट गरिएको हो ।
घटना बारे जिल्ला प्रहरी कार्यालय सर्लाहीका प्रहरी उपरिक्षक सन्तोषसिंह राठौरले भने कुनैपनि आरोपमा कसैलाई कानून हातमा लिएर कुटपिट गर्नु गलत हो । युवकलाई वास्तवमा कुटिपिट गरिएको हो, तर सही कुरा अनुसन्धानपछि मात्रै आउनेछ ।
उनले भने मंगलवार जिल्ला प्रहरी कार्यालयमा कुटपिट गरिएको अवस्थामा वडाध्यक्ष सहितका व्यक्तिले चोर हो भनी घाइते अवस्थामा ती युवकलाई ल्याएको थियो । हामीले घाइते युवकलाई उपचारका लागि पठाई दिएका थियौं । यसैबीचमा पीडक र पिडीत दुवै पक्षबाट निवेदन परेको छ । तर दोषी जो कोही भएपनि उम्किने छैन कानून बमोजिम कारवाही हुने नै छ ।
यो विषयमा आफ्नो प्रतिक्रिया दिनुहोस् !