फुलगेन पण्डित/जनकपुरधाम, असोज १७ गते । क्यान्सर पिडीत धनुषाको सबैला नगरपालिका १० का बालक रितिक कपारको उपचारका लागि स्थानीय सोनासती युवा क्लबले आर्थिक सहयोग गरेको छ ।
काठमाडौ महाराजगंज स्थित कान्ति बाल अस्पतालमा उपचाररत सबैला नगरपालिका १० निवासी राजेश कापरका २ वर्षिय छोरा रितिक कापरलाई कतारमा कार्यरत सोनासती युवा क्लबका अध्यक्ष धर्मदेव कापरले नेपाली कामदारहरुबाट चन्दा संकलन गरी आर्थिक सहयोग गरेका हुन ।
कतारमा कार्यरत नेपाली कामदारहरुले बच्चाको ब्लड क्यान्सरको उपचारको लागि अध्यक्ष कापरको प्रयासमा एकआपसमा चन्दा संकलन गरेर दुई लाख ५० हजार ५५ रुपैया सहयोग गरेका हुन ।
सहयोग स्वरुपको उक्त रकम क्लबका उपाध्यक्ष शिवनाथ कापरले पिडीत बालकका हजुर आमा मनतोरिया देवीलाई शुक्रवार स्थानीय बुद्धिजीवी, नागरिक समाजका अगुवा र क्लबका पदाधिकारीहरुको उपस्थितिमा सो रकम नगद नै हस्तान्तरण गरिएको कुरा सचिव ललित कापरले जानकारी दिएका छन ।
सोनासती युवा क्लब शक्तिपीठ सोनासतीमा पुजापाठको व्यवस्था र सामाजिक कार्यक्रमहरु आयोजना गर्दै आएको छ । कतारमा कार्यरत नेपाली कामदारहरुबाट चन्दा संकलन गरी सबैलाको खरिहानी लगायतका क्षेत्रमा विभिन्न सामाजिक कार्य गर्दै आएको हो । कोरोना संक्रमण रोकथाम गर्न जारी लकडाउनमा समेत सो क्लबले जनचेतना फैलाउनेदेखि राहत वितरण लगायतका कार्यक्रम समेत गरेको थियो ।
राजेशले आफ्नो छोराको उपचारका लागि सामाजिक सञ्जाल सहित विभिन्न संचार माध्यम सहयोग गर्न आग्रह गरेको थियो । उनले ब्लड क्यान्सर पिडीत आफ्नो छोराको उपचार निकै महंगो रहेकोले समस्या भइरहेको भन्दै सहयोगका लागि अपिल गरेका थिए ।
यो विषयमा आफ्नो प्रतिक्रिया दिनुहोस् !