जनकपुरधाम, भदौ २२ गते । सिरहाको चोहर्वास्थित मारुती सिमेन्ट उद्योगले कब्जा गरेको सार्वजनिक जग्गा फिर्ताको मांग गर्दै उद्योगको गेट अगाडी नै स्थानीयले प्रदर्शन गरेका छन ।
सिमेन्ट उद्योगको गोरख धन्धाविरुद्ध गठित संघर्ष समितिले सोमवार प्रदर्शन गरेको हो । सयौंको संख्यामा सहभागी प्रदर्शनकारीहरुले ‘सार्वजनिक जग्गा फिर्ता गर, धुवाँ धुलो बन्द गर, रोजगारीमा स्थानीयलाई प्राथमिकता दे’ लगायतका नारासहित प्रदर्शन गरेका हुन् ।
समितिका संयोजक चिरञ्जीवी यादवले भने,‘मारुती सिमेन्ट उद्योगले गोलबजार नगरपालिका र नरहा गाउँपालिकामा पर्ने झण्डै साढे तीनदेखि चार बिघासम्म वनको सार्वजनिक जग्गा अतिक्रमण गरेको छ । उद्योगबाट निस्कने प्रदुषित धुवाँले आसपासका बस्ती समेत जोखिममा परेका छन् ।’
मारुती सिमेन्ट उद्योग परिसरमै रहेको शारदा डिष्ट्रिलरीले समेत घुर्मी खोलाबाट बगाउँदै आएको विषादियुक्त पानीले यहाँका सर्वसाधारणको स्वास्थ्यमा विभिन्न किसिमको समस्या देखिनुका साथै अन्नबालीमा गम्भीर क्षति हुँदै आएको प्रदर्शनकारीहरुको आरोप छ ।
‘मनोमानीका कारण गोलबजार नगरपालिका, मिर्चैया नगरपालिका र नरहा गाउँपालिकासहित घुर्मी नदीको छेउमा रहेका दर्जनौं गाउँका लाखौं जनता प्रत्यक्ष रुपमा प्रभावित भएका छन् ।’यी कारखानाहरुले यहाँका जनप्रतिनिधिहरुको मिलोमतोमा मनोमानी गर्दै आएको आरोप समेत उनीहरुको रहेको छ ।
मंगलबार हड्पिएको सार्वजनिक जग्गामा प्रदर्शन गर्ने कार्यक्रम रहेको यादवले जानकारी दिए । सिमेन्ट उद्योग नसच्चिएसम्म आफुहरुको आन्दोलन जारी रहने उनले बताएका छन् ।
यो विषयमा आफ्नो प्रतिक्रिया दिनुहोस् !