जनकपुरधाम, भदौ २० गते । महोत्तरीको पिपरा गाउँपालिकाले आर्थिक उपार्जनका आन्तरिक श्रोत स्वरुप पोखरीहरु ठेक्का लगाउने कार्य शुरु गरेको छ ।
गाउँपालिका भित्र कुल ५७ वटा पोखरी मध्ये पहिलो चरणमा २९ वटा पोखरी लगाउने निर्णय गरेको छ । सो निर्णय बमोजिम शुक्रवार वडा नम्बर १, २, ३ र ४ स्थित १४ वटा पोखरी ठेक्का लगाइसकेको छ भने आइतवार बांकी रहेका वडा नम्बर ५, ६ र ७ का १५ वटा पोखरीको ठेक्का प्रक्रिया शुरु गर्ने भएको छ ।
पहिलो चरणमा ठेक्का लगाइएका पोखरीबाट वार्षिक करीब ५ करोड रुपैया आम्दानी हुने श्रोत सुनिश्चित भएको गाउँपालिकाका अध्यक्ष विक्रम चौधरीले बताएका छन ।
उनले भने शुक्रवार लगाइएको १४ वटा पोखरी ठेक्काबाट मात्रै करीब अढाई करोड रुपैया संकलन भएको छ भने आइतवार समेत सोही हाराहारीमा रकम संकलन हुन सक्ने अनुमान गरिएको छ । ५७ वटै पोखरी ठेक्का लागि सकेको अवस्थामा ७/८ करोड रुपैयासम्म गाउँपालिकाको आम्दानीको श्रोत हुने अनुमान गरिएको उनले बताए ।
लोकपुकारसँग कुरा गर्दै अध्यक्ष चौधरीले भने वर्षौदेखि ती पोखरीहरुको संरक्षण हुन नसकेको कारण जलकुम्भी लागेर पुरिने अवस्थामा थियो । ग्रामीण क्षेत्र भएको हुनाले स्थानीय ती पोखरीमा नुहाउने, बर्तनभाडा मांझने, लुगाकपडा धुने सहित चौपाया पशु नुहाउने र त्यसले पानी समेत खाने गरेको थियो ।
तर संरक्षण आभावमा पोखरीको पानी फोहर र जलकुम्भीले गर्दा स्थानीयवासी समेत समस्या भोग्नु परिरहेको थियो । तर अब ठेक्का लागिसकेपछि ठेकेदारले व्यवसायिक प्रयोजनका लागि पोखरी र त्यसको पानी समेत सफा गराउने भएकाले स्थानीयलाई समेत फाइदा हुनेछ ।
ठेक्का लागि सकेपछि स्थानीयलाई ती ठेकेदारले पोखरी प्रयोग गर्न दिन्छ भन्ने के ग्यारेन्टी भन्ने प्रसंगमा अध्यक्ष चौधरीले भने ठेक्काको शर्त नै छ ठेकेदारले जे प्रयोजन गरेपनि स्थानीयलाई प्रयोग गर्नमा कुनै अवरोध गर्ने छैन । उनले भने आफू राजनीति गर्ने व्यक्ति हो स्थानीयलाई समस्या भए भोलीका दिन आफूलाई पनि समस्या हुनेछ ।
कोरोना भाइरसको रोकथामका लागि जारी निषेधाज्ञा विपरित पोखरी ठेक्काका लागि डाक बढाबढका लागि भीड जम्मा गराएको भन्ने आरोपमा अध्यक्ष चौधरीले भने निषेधाज्ञा उल्लंघन नहुने गरी न्यून सहभागितामा पुर्ण व्यस्थित तरिका डाक बढाबढ कार्यक्रम आयोजना गरियो दाबी गर्दै विपक्षी दलले यस्तो आरोप लगाएको हुन सक्ने बताए ।
उनले भने स्थानीय तहको निर्वाचन अघि ती पोखरीहरु छाडा थियो, केहीले त कब्जा नै गरी प्रयोग गर्दै आएको थियो । तर आफू निर्वाचित भएपछि ती पोखरीहरु गाउँपालिकाले आफ्नो नियन्त्रणमा लिएपछि केही व्यक्तिलाई अपच समेत भएकोले गलत अपवाद फैलाएको हो ।
यो विषयमा आफ्नो प्रतिक्रिया दिनुहोस् !