जनकपुरधाम, साउन ३० गते । चिकित्सकको लापरवाहीले मृत्यु भएको घटनामा प्रहरीले गरेको लाठी चार्जबाट एक पत्रकार र पिडीत परिवार सहित आधा दर्जन व्यक्ति घाइते भएको छ ।
बिहीवार नवजीवन अस्पतालमा चिकित्सकको लापरवाहीले मृत्यु भएकी महिलाको शव पिडीत परिवारले उठाउन नमानेपछि शुक्रवार प्रहरीले बर्बरतापुर्वक गरेको लाठी चार्जले समाचार संकलनमा गएका थाहा खबरका संवाददाता सन्तोष यादव सहित पिडीत परिवारका आधा दर्जन व्यक्ति घाइते भएको छ ।
जनकपुरधाम उपमहानगरपालिका १ धर्मवाणटोलकी ३५ वर्षीय रुकमणि देवी सदाको चिकित्सकको लापरवाही भएको भन्दै पिडीत परिवारले दोषी चिकित्सकमाथि कारवाही र क्षतिपूर्तिको मांग राखेपछि अस्पतालको साथ दिदैं प्रहरीले धरपक्कड गरेपछि विवाद उत्पन्न भएको थियो ।
विवाद भइरहेकै क्रममा प्रहरीले लाठी चार्ज गर्न थालेपछि समाचार संकलनका लागि गएका पत्रकार यादवले पत्रकार हुँ भन्दा भन्दै निर्ममतापुर्वक लाठी चार्ज गर्दै घाइते बनाएका हुन । आफू पत्रकार भएको जानकारी दिएर परिचयपत्र समेत देखाउँदा पनि प्रहरीले लाठी प्रहार गरेको घाइते पत्रकार यादव बताए ।
आज बिहान डाक्टरको लापरबाहीले महिलाको मृत्यु शीर्षकमा समाचार लेख्ने तैं हैनस् भन्दै प्रहरीले म माथि पटक पटक लौरो प्रहार ग¥यो,’ यादवले भने, ‘मलाई मात्र हैन, मेरो साथी सिवेन्द्र रोहितालाई पनि प्रहरीले कुटयो । प्रहरीले कुटपिट मात्रै होइन पत्रकार यादवको क्यामेरा समेत प्रहरीले खोसेर भिडियो डिलिट गरिदिएको उनले बताए ।
पीत थैलीको अप्रेशन गर्दा आन्दा काटेपछि मृत्यु भएको भन्दै बिरामीका आफन्तजन र स्थानीयले चार सुत्रिय माग राख्दै शव नउठाउने अडान राखेका थिए । बिहीबार राति पनि मृतकका आफन्त र स्थानीयले प्रदर्शन गर्दा प्रहरीले लाठी चार्ज गरी आधादर्जन बढीलाई घाइते बनाएका थिए ।
यता धनुषाका डीएसपी मकेन्द्र कुमार मिश्रले २४ घण्टासम्म लास नउठाउँदा गन्हाएर अन्य बिरामीलाई समस्या हुने भएकाले बल प्रयोग गरिएको बताएका छन । उनले भने शवलाई पोस्टमार्टमको लागि प्रादेशिक अस्पताल जनकपुरमा राखिएको र कानुन बमोजिम दोषीमाथि काबराही हुनेछ ।
यो विषयमा आफ्नो प्रतिक्रिया दिनुहोस् !