जनकपुरधाम, साउन २१ गते । प्रदेश २ स्थित मन्त्रालयका कर्मचारीहरु संक्रमित हुन थालेपछि मन्त्रालयको सम्पूर्ण कामकाज बन्द गरी कार्यालय बन्द गरिएको छ ।
पछिल्लो पटक समाजिक विकास मन्त्रालयमा ४ र मुख्यमन्त्री कार्यालय कार्यालयमा ६ जनामा कोरोना संक्रमण देखिएपछि सतर्कता र सुरक्षा अपनाउन प्रदेश स्थित उद्योग, पर्यटन, वन तथा वातावरण मन्त्रालय बाहेक सबै मन्त्रालयको कार्यालय बन्द गरिएको छ ।
मुख्यमन्त्री तथा मन्त्रिपरिषदको कार्यालयको सम्पूर्ण कामकाज बन्द गरी बाहिर मूल ढोकामै ताल्चा लगाइएको छ भने समाजिक विकास मन्त्रालय, आर्थिक तथा योजना मन्त्रालय, आन्तरिक तथा कानून मन्त्रालय र भौतिक पुर्वाधार विकास मन्त्रालयको कायालयमा बुधवार ताल्चा लगाइएको देखियो ।
मुख्यमन्त्री लालबाबु राउतका प्रेस सल्लाहका अनुसार मन्त्रालयमा संक्रमित फेला परेपछि अन्य कर्मचारी र सेवाग्राहीको सुरक्षाको दृष्टिगत गर्दै सोही दिनदेखि कार्यालयको कामकाज बन्द गरिएको हो ।
कन्ट्राक्ट ट्रेसिंग सहित सबै कर्मचारीको स्वाब संकलन गरिएको रिपोर्ट आएपछि मुख्यमन्त्री कार्यालय लगायत अन्य मन्त्रालयको कार्यालय खोलेर कामकाज शुरु गरिने उनले बताए ।
एक मन्त्रालयका कर्मचारीले पछिल्लो पटक कोरोनाबाट मन्त्रालयकै कर्मचारीहरु संक्रमित हुन थालेपछि माथिल्लो निर्देशनानुसार हामी असुरक्षा महसूस गरेर काम बन्द गरेका हौं, यहाँ प्रदेशभरिका जनता काम गराउन आउंछ कथमकदाचित कुनै संक्रमित नै आइ दिएको खण्डमा हामी पनि असुरक्षित हुने छौ सोचेर कार्यालय जान छाडेको बताए ।
प्रदेश २ अहिले कोरोना संक्रमणको हटस्पट नै बनेको छ । उच्च जोखिमको दृष्टिगत गर्दै सर्तकता र सुरक्षाका लागि प्रदेशका ४ जिल्ला र ३ जिल्लाका प्रमुख शहरहरुमा निषेधाज्ञा जारी गरिएको छ । प्रदेश २ मा हालसम्म ५ हजारभन्दा बढी व्यक्ति संक्रमित भइसकेका छन ।
यो विषयमा आफ्नो प्रतिक्रिया दिनुहोस् !