जनकपुरधाम, साउन १९ गते । प्रदेश २ मा समुदायस्तरमा फैलिएको कोरोना संत्रमण अब मुख्यमन्त्री तथा मन्त्रिपरिषदको कार्यालय छिरेको छ ।
सोमवार समाजिक विकास मन्त्रालयद्वारा पीसीआर परिक्षणको जारी रिपोर्ट अनुसार मुख्यमन्त्री कार्यालयका ६ जना कर्मचारी र प्रादेशिक अस्पतालका १८ जना सहित पछिल्लो २४ घण्टामा १ सय ३ जना संक्रमित भएका छन ।
अस्थायी राजधानी जनकपुरधामस्थित प्रादेशिक प्रयोगशालामा स्वाब संकलन गरि पीसीआर परिक्षण गर्दा मुख्यमन्त्री कार्यालयका एक जना अधिकृत, एक जना ट्राफिक प्रहरी, २ जना सवारी चालक र कार्यालयकै अन्य २ जना कर्मचारी गरी ६ जनामा कोरोना पुष्टि भएको धनुषाका प्रमुख जिल्ला अधिकारी प्रेम प्रसाद भट्टराईले जानकारी दिएका छन् ।
यसअघि प्रदेशका सामाजिक विकास मन्त्रालयका ३ जना कर्मचारी समेत संक्रमित भएका थिए । मन्त्री नवलकिशोर साहका कार्यालय सहयोगी, भान्से र चालकमा कोरोना पुष्टि भएको थियो ।
त्यसैगरी प्रादेशिक अस्पताल जनकपुरधामका चिकित्सक स्वास्थ्यर्मी र कर्मचारी सहित १४ जना कर्मचारीमा कोरोना संक्रमण पुष्टि भएको छ । यसअघि पनि त्यस अस्पतालका ४ जना स्वास्थ्यकर्मीमा संक्रमण देखिएको थियो ।
संक्रमित मध्ये २ जना चिकित्सक, १ जना नर्स र बाँकी १५ जना स्वास्थ्यकर्मी, सफाई कर्मचारी र प्राविधिकहरु रहेका छन् । ३ दिन अगाडी आएको स्वाब संकलनको नतिजा र सोमबार आएको स्वाब संकलनको नतिजा गरी अस्पतालका १८ जना चिकित्सक र कर्मचारीहरु संक्रमित भएको अस्पताल स्रोतले जनाएको छ ।
मन्त्रालयका अनुसार प्रदेश नं.२ मा सोमवार मात्रै १ सय ३ जना व्यक्तिमा कोरोना संक्रमण पुष्टी भएको छ । यो संगै संक्रमितको संख्या ५ हजार ९ पुगेको छ ।
जारी तथ्यांक अनुसार पर्सामा ३८ जना, धनुषामा ३० जना, महोत्तरीमा ३० जना, बारामा ३ जना, सिरहामा १ जना र सर्लाहीमा १ जना व्यक्ति संक्रमित भएका छन् । संक्रमितमध्ये ४ हजार ५ सय ५४ पुरुष र ४ सय ५५ जना महिला रहेको प्रदेश स्वास्थ्य निर्देशनालयका वरिष्ठ जनस्वास्थ्य प्रशासक विजय कुमार झाले जानकारी दिए ।
प्रदेश २ को आठवटै जिल्लाका बिभिन्न ठाउँहरुमा निर्माण गरिएको १५ हजार ७ सय ७३ बेड क्षमताको २ सय ५३ वटा क्वारेन्टाइनमा अहिले १ हजार ५ सय ८८ जनालाई राखिएको छ भने २ हजार २ सय ७४ जनालाई होम क्वारेन्टाइनमा पठाइएको छ ।
प्रदेशका आठवटै जिल्लाको बिभिन्न ठाउँहरुमा सञ्चालनमा रहेको २ हजार ४ सय ४९ बेड क्षमताको आईसोलेशनमा सप्तरीमा १ सय ८८, सिरहामा २५, धनुषामा ७५, महोत्तरीमा ३८, सर्लाहीमा ४८, रौतहटमा २, बारामा २० र पर्सामा २ सय ३० जना गरि ६ सय २६ जनालाई भर्ना गरिएको वरिष्ठ जनस्वास्थ्य प्रशासक झाले जानकारी दिए ।
प्रदेश २ मा सबैभन्दा बढी रौतहट जिल्लामा १ हजार २ सय ५९ जना संक्रमित भएका छन् । महोत्तरीमा ८ सय २३, धनुषामा ७ सय २९, सर्लाहीमा ७ सय ११, पर्सामा ५ सय ८०, सप्तरीमा ५ सय १५, सिरहामा २ सय १४ र बारामा १ सय ७८ जना व्यक्तिमा कोरोना संक्रमण पुष्टि भएको हो ।
यो विषयमा आफ्नो प्रतिक्रिया दिनुहोस् !