जनकपुरधाम, साउन १७ गते । प्रदेश २ सरकारका मन्त्रीहरुकै आतिथ्यमा कोरोना फैलाउने कार्य भइरहेको देखिएको छ ।
संघीय र प्रदेश सरकार स्वयंले विभिन्न सभा सम्मेलन, भेला, सामूहिक एवं सार्वजनिक कार्यक्रमहरु नगर्न गराउन पटक पटक सचेत गराई रहेका बखत प्रदेशका आन्तरिक मामिला तथा कानून मन्त्री र आर्थिक मामिला तथा योजना मन्त्री सहित प्रदेश सांसदहरुको आतिथ्य हजारौको सहभागितामा पार्टी प्रवेश कार्यक्रम सम्पन्न भएको छ ।
प्रदेशका आन्तरिक मामिला तथा कानून मन्त्री ज्ञानेन्द्र यादव र आर्थिक मामिला तथा योजना मन्त्री विजय यादवको प्रमुख आतिथ्य धनुषाको धनषाधाममा हजारौको सहभागितामा बिना कुनै समाजिक दूरी वा अन्य मापदण्ड पुरा गरी पार्टी प्रवेश कार्यक्रम सम्पन्न भएको हो ।
समुदायमा कोरोना फैलिसकेको अवस्थामा प्रदेशका मन्त्री र सांसदहरुको आथित्यमा नै यसरी हजारौको भीड जुटाएर कोरोना भाइरस रोकथाम एवं नियन्त्रण मापदण्डको धज्जी उडाउंदै सार्वजनिक कार्यक्र गर्नु भनेको प्रदेश सरकारदारा नै कोरोना संक्रमण फैलाउने कार्य भइरहेको जनकपुरका स्थानीय जनताको बुझाई छ ।
समुदायमा कोरोना संक्रमण फैलिसकेको कारण वीरगञ्ज, राजविराज, जनकपुर सहितका प्रदेशका मुख्य शहरी आक्रान्त र त्रसित बनेका छन । यस्तो अवस्थामा मन्त्री र सांसद जस्ता व्यक्तिले पार्टीका कार्यक्रमका लागि आम जनताको ज्यान जोखिम पार्ने कार्य निन्दनीय रहेको जनकपुरका स्थानीय युवा श्याम साहले बताए ।
धनुषाधाममा मात्रै होइन दुई दिनअघि समेत प्रदेशका सिरहा जिल्लामा पार्टीका अध्यक्ष एवं पूर्व स्वास्थ्य मन्त्री उपेन्द्र यादव र वरिष्ठ नेता एवं पुर्व प्रधानमन्त्री डा. बाबुराम भट्टराईको आतिथ्यमा हजारौको सहभागितामा पार्टी प्रवेश सम्पन्न भएको थियो ।
जसपा पार्टीबाट आबद्ध संघीय सांसद प्रदीप यादव र विरगञ्जका मेयर विजय सरावगी समेत कोरोना संक्रमित भइसकेको अवस्थामा आफूलाई चेतनु र जनतालाई जोगाउनुका सट्टा जसपा पार्टी र ती पार्टीसँग आबद्ध मन्त्री तथा सांसदहरुले कोरोना संक्रमण निम्त्याउने काम पार्टी प्रवेशको नाममा गर्दै आएको प्रष्ट हुन्छ ।
प्रदेश २ हालसम्म ४ हजार ६ सय ७३ जना संक्रमित भइसकेको छ भने संक्रमणले १७ जनाको मृत्यु भइसकेको छ । दर्जनौ व्यक्ति गम्भीर अवस्थामा रहेका छन । हजारौको सहभागिताको भीडमा आयोजित सो कार्यक्रममा एकजनामा पनि कोरोना संक्रमण रहेको खण्डमा कति जनालाई लागिसकेको होला अनुमान गर्न सकिदैन ।
यस्तो संक्रमणकालिन परिस्थितिमा जनतालाई जोगाउन पीसीआर चेकजाँच, आइसोलेशन, भेन्टीलेटर व्यवस्था र जनचेतना फैलाउनुका सट्टा जसपा नेतृत्वको प्रदेश २ सरकारका मन्त्रीहरुले पार्टी प्रवेशको नाममा संक्रमणलाई झन निम्तो दिइरहेका छन ।
यो विषयमा आफ्नो प्रतिक्रिया दिनुहोस् !