जनकपुरधाम, साउन १४ गते । प्रदेश २ को अस्थायी राजधानी जनकपुरधाममा समेत समुदायस्तरमा कोरोना भाइरस संक्रमण बढदै गएको छ ।
पछिल्लो २४ घण्टामा सामाजिक विकास मन्त्रालयका ३ जना कर्मचारी सहित जनकपुरधाममा १३ जना संक्रमित पुष्टि भएको छ । राजधानी भित्र ह्वातै कोरोना संक्रमण बढदै गएपछि खतरा बढेको छ ।
समुदायमा संक्रमणको खतरा बढदै गएपनि सरकार र स्थानीय प्रशासनले त्यसलाई रोक्न कुनै कदम चालेको छैन । बजार पुर्ण रुपमा खुल्ला रहेको छ भने सार्वजनिक ठाउँमा भीडभाड उतिकै बढेपनि कुनै चासो नलिइएको प्रति स्थानीय त्रसित भएका छन ।
समाजिक विकास मन्त्रालयले सार्वजनिक गरेको तथ्यांक अनुसार जनकपुरधाम उपमहानगरपालिका वडा नं. १, ६, ७, ९, १० मा एक÷एकजना गरी ५ जना, गोपाल धर्मशाला क्वारेन्टाईनमा ४, मन्त्रालयमा ३ र बैंकका एकजना कर्मचारी गरी १३ जनामा संक्रमण पुष्टि भएको हो ।
प्रदेशमा बुधबार १० जना नेपाली सेना, ३ जना सामाजिक विकास मन्त्रालयका कर्मचारी र १ जना बैंकका कर्मचारी सहित ६१ जना व्यक्तिमा कोरोना संक्रमण पुष्टी भएको छ । मन्त्रालयको तथ्यांक अनुसार धनुषामा १२, महोत्तरीमा १३, सर्लाही र सप्तरीमा १÷१, पर्सामा ३४ जनामा संक्रमण पोजेटिभ देखिएको हो ।
योसँगै यस प्रदेशमा संक्रमितको संख्या ४ हजार ५ सय ४४ पुगेको छ । संक्रमितमध्ये ४ हजार १ सय ८३ पुरुष र ३ सय ६१ जना महिला रहेको प्रदेश स्वास्थ्य निर्देशनालयका वरिष्ठ जनस्वास्थ्य प्रशासक विजय कुमार झाले जानकारी दिएका छन ।
प्रदेशमा संक्रमित दिनदिनै बढदै गएपनि उपचारका लागि सरकारले आइसोलेशन कक्षको निर्माण गर्न असक्षम देखिएको छ । संक्रमितको सख्या साढे ४ हजारभन्दा बढी रहेको अवस्थामा समाचार लेख्दासम्म प्रदेशका आठवटै जिल्लाको बिभिन्न ठाउँहरु गरी मात्र २ हजार २ सय ३७ बेड सहितको आइसोलेशन वार्डको व्यवस्था गरिएको छ ।
प्रदेश २ मा हालसम्म पर्सामा ५, बारामा २, रौतहटमा २, महोत्तरीमा १, धनुषामा १ र सप्तरीमा १ जना गरि १२ जनाको कोरोना संक्रमणका कारण मृत्यु भइसकेको छ ।
यो विषयमा आफ्नो प्रतिक्रिया दिनुहोस् !