जनकपुरधाम, साउन १३ गते । गत आर्थिक वर्ष २०७६/०७७ मा प्रदेश २ मा ४ सय ३३ जनाको सवारी दुर्घटनामा मृत्यु भएको छ ।
प्रदेश प्रहरी कार्यालय जनकपुरधामका अनुसार प्रदेशको ८ वटा जिल्लामा भएको सवारी दुर्घटनामा ४ सय ३३ जनाको मृत्यु भएको हो जुन पछिल्लो वर्षभन्दा कम रहेको छ । आर्थिक वर्ष २०७५/०७६ मा ४ सय ७४ जनाको मृत्यु भएको थियो ।
प्रदेश प्रहरी कार्यालय जनकपुरका प्रहरी प्रवक्ता प्रहरी नायव उपरीक्षक मकेन्द्र कुमार मिश्रले दिएको जानकारी अनुसार गत आर्थिक वर्षमा सवारी ज्यानमा ४ सय ८ र सवारी भवितव्यमा २५ वटा मुदा दर्ता भएको छ । सबैभन्दा बढी सिरहामा ८० जनाले सवारी दुर्घटनामा व्यक्तिहरुले ज्यान गुमाएका हुन ।
त्यस्तै सप्तरीमा ७५ जनाले सवारी दुर्घटनामा ज्यान गुमाएका छन् भने ८ जनाको अंगभंग भएको हो । बारामा ६२ जनाले आफ्नो ज्यान गुमाएका छन् र ५ जनाको अंगभंग भएको छ भने धनुषा र सर्लाहीमा ५३÷५३ जनाले ज्यान गुमाएका छन् भने धनुषामा ३ र सर्लाहीमा ४ जनाको अंगभंग भएको छ । महोत्तरीमा ४७ जनाले सवारी दुर्घटनामा ज्यान गुमाएका छन् भने १ जनाको अंगभंग भएको हो ।
त्यस्तै रौतहटमा ४२ को मृत्यु र ५ जनाको अंगभंग भएको छ । पर्सामा भने २१ जनाको सवारी दुर्घटनामा मृत्यु भएको हो भने २ जनाको अंगभंग भएको २ नम्बर प्रदेश प्रहरी कार्यालयले जनाएको छ । गत आर्थिक वर्षको करिब ४ महिना लकडाउन रहेको कारण दुर्घटनामा केहि कमी आएको जनाइएको छ ।
यस भन्दा पहिले आर्थिक वर्ष २०७५÷०७६ मा सवारी दुर्घटनामा ४ सय ७४ जनाको मृत्यु भएको थियो भने ४४ जनाको अंगभंग भएको थियो । त्यस्तै आर्थिक वर्ष २०७४/७५ मा सवारी दुर्घटनामा ४ सय १६ जनाको मृत्यु भएको थियो भने ३२ जनाको अंगभंग भएको प्रदेश प्रहरी कार्यालयले जनाएको छ ।
यो विषयमा आफ्नो प्रतिक्रिया दिनुहोस् !