जनकपुरधाम, साउन १२ गते । कोरोना भाइरस संक्रमणबाट धनुषामा एकजनाको मृत्यु भएपछि प्रदेश २ स्थित प्रादेशिक अस्पतालको आईसीयु (सघन कक्ष) सिल गरिएको छ ।
हिजो आइतवार धनुषाको शहीदनगर नगरपालिका डुमरियाका ३८ वर्षीय एक युवकको उपचारको क्रममा संक्रमणबाट मृत्यु भएपछि जिल्ला सुरक्षा समितिको निर्णयानुसार प्रादेशिक अस्पतालको आईसीयु ७ दिनका लागि सिल गरिएको हो ।
जनकपुरधाम स्थित एक निजी क्लिनिकमा चेकजाँच गराएका ती युवकमा खोकी, श्वास प्रश्वासमा समस्या र ज्वरो सहितका कोरोना संक्रमणको लक्षण देखिएपछि प्रादेशिक अस्पताल रेफर गरिएको थियो ।
गत साउन १० गते नै प्रादेशिक अस्पताल भर्ना भएका ती युवकको स्वास्थ्य अवस्था गम्भीर हुँदै गएपछि आईसीयू (सघन कक्ष) मा राखि उपचार भइरहेको थियो र उपचारकै क्रममा मृत्यु भएको प्रादेशिक अस्पताल जनकपुरको कोभिड आइसोलेसन सेन्टरका संयोजक डा. जामुनप्रसाद सिंहले बताएका छन ।
कोरोनाको सम्पूर्ण लक्षण देखिएका बिरामी ती युवकको भर्ना भएकै दिन साउन १० गते नै कोरोना परिक्षणका लागि स्वाब संकलन गरी प्रादेशिक जनस्वास्थ्य प्रयोगशाला पठाइएको थियो । तर मृत्युको अघिल्लो दिनमात्र उनी कोरोना पोजेटिभ रहेको पुष्टि भएको हो ।
डा. सिंहले भने बिरामीको स्वास्थ्य झन बिग्रिदै गएपछि भेन्टिलेटर आभावमा उनको परिवारजनको सहमतिमा बीपी कोइराला स्वास्थ्य विज्ञान प्रतिष्ठान धरान रेफर गरेका थियौं । थप उपचारका लागि धरान लैजाने क्रममा बाटोमै उनको मृत्यु भयो ।
मृत्युको खबर पाएपछि प्रमुख जिल्ला अधिकारीको संयोजकत्वमा रहेको सुरक्षा समितिको आकस्मिक बैठकबाट उपचारत स्थल आईसीयू कक्ष ७ दिनका लागि सिल गर्ने निर्णयानुसार सोमवारदेखि सिल डा. सिंहले जानकारी दिए । उनले भने एक÷एक दिन स्वाब संकलन र कक्ष सेनिटाइज्ड तथा ५ दिन रिपोर्ट आउनमा लाग्ने सक्ने समयको मध्यनजर गर्दै सो अवधिसमका लागि हामीले आईसीयू कक्ष सिल गरेका हौं ।
सिल अवधिभर आईसीयू कक्षमा रहेका ६ जना बिरामी, १५ जना स्वास्थ्यकर्मी सहितका कर्मचारी र ३÷४ जना कुरुवा बाहिर निस्किन पाउने छैन भने बाहिरबाट पनि कोही भित्र नजाने गरी सिल गरिएको हो । सो अवधिसम्म नयाँ बिरामी पनि आईसीयू कक्षमा राखिदैन डा. सिंहले भने ।
यसैबीच कोरोना पुष्टि भइसकेका ती मृतक युवकको सम्पर्कमा रहेका परिवारका ६, उपचारमा संलग्न चिकित्सक स्वास्थ्यकर्मी, एम्बुलेन्स चालक सहितको कोरोना परिक्षण हुने बताइएको छ । हाल मृतकका परिवारलाई जनकपुरधाम स्थित गोपाल धर्मशाला क्वारेन्टाईनमा राखिएको छ ।
घटना पश्चात मृतकको शव अन्तिम संस्कारका लागि नेपाली सेनाको जिम्मा लगाई सकिएको छ । कोरोना संक्रमितबाट मृत्यु भएको धनुषामा यो पहिलो घटना हो ।
यो विषयमा आफ्नो प्रतिक्रिया दिनुहोस् !