जनकपुरधाम, असार ९ गते । धनुषामा एकजना भारतीयले ४० हजार रुपैया खर्चेर वंशजको आधारमा नागरिकता बनाएको रहस्य खुलेको छ ।
पुस्तैदेखि नेपालमै बसोबास गर्दै आइरहेका व्यक्तिहरु आवश्यक कागजात र प्रमाणको आभावमा नागरिकता पाउन नसकेको अवस्थामा जिल्ला प्रशासन कार्यालय सहित सम्बन्धित निकायको मिलामतोमा नक्कली नागरिकता बनाउनेहरुको बिगबिगी बढेर गएको छ ।
प्राप्त जानकारी अनुसार भारतको सीतामढी जिल्ला सुरसण्ड प्रखण्डको कुम्मा ग्राम बस्ने रोशन ठाकुर भन्ने भारतीय नागरिकले बनाएको हो । भारतीय नागरिक रहेपनि रोशनले वंशजको आधारमा नागरिकता बनाएको आरोप उनकै भाई रमेश ठाकुरले दाबी गरेका छन ।
बाबु त्रिवेणी ठाकुरसँग नेपाली नागरिकता नरहेपनि रोशनले वंशजको आधारमा ४० हजार खर्चेर जिल्ला प्रशासन कार्यालयका कर्मचारीको मिलामतोमा नागरिकता बनाएको रमेशले संचारकर्मीसंग रमेशले दाबी गरे । उनले भने पुरानै मितिमा करीब अढाई वर्ष अघि रोशनले नागरिकता बनाएका हुन । प्रशासकीय अधिकृत विनोदकुमार दहालको हस्ताक्षरमा राजेशको नाममा रहेको नागरिकता प्रमाणपत्रमा जारी मिति भने २०६४/३/६ उल्लेख छ ।
रमेशले त्रिवेणी ठाकुरको भारतीय मतदाता पहिचानपत्र हेराउंदै भने बुवा भारतीय नागरिक हुन तर नागरिकतामा धनुषा जिल्ला जनकपुर ४ उल्लेख छ । ‘बाबुले नेपाली नागरिकता नपाइकन छोराले कसरी वंशजको नागरिकता पाउन सक्दछ प्रश्न गर्दै रोशनले लिएको नागरिकता फर्जी रहेको भने ।
नागरिकता ऐन २०६३ को दफा ३ अनुसार आमा वा बुवा नेपाली नागरिक भएमा वंशजको आधारमा नागरिकता पाउन सक्नेछ । तर रोशनसँग न त आमा न बुवा नै नेपाली नागरिक छैनन ।
२०७५ मंसिरमा धनुषा प्रहरीले जनकपुरबाट नक्कली नागरिकता बनाउन गिरोहलाई पक्राउ गरेको थियो । पक्राउ पर्ने मध्येमा जिल्ला प्रशासन कार्यालय धनुषाका ४ जना कर्मचारीसमेत थिए । अहिले तिनीहरु कारागारमा छन् ।
धनुषाका प्रमुख जिल्ला अधिकारी कोषहरि निरौलाले रोशनसँग रहेको वंशज नागरिकतापनि सोही गिरोहले तयार पारेको हुनसक्ने आशंका व्यक्त गरेका छन् । नागरिकता प्रमाणपत्रमा प्रशासकीय अधिकृतको हस्ताक्षर नक्कली रहेको दाबी गर्दै उनले नक्कली नागरिकता लिने र दिने जो सुकै भएपनि कारबाहीको दायरामा आउने बताएका छन् ।
प्रजिअ निरौलाका अनुसार जिल्लामा नक्कली नागरिकतासम्बन्धी १८ वटा उजुरी आएको र सबैको अनुसन्धान भइरहेको छ । उनले भने, हामी कहाँ आएको उजुरीका साथै अहिले देखिएको वंशज नागरिकताबारे समेत तत्काल छानबिन सुरु भएर लिने र दिने दुबैलाई कारबाही हुन्छ ।
यो विषयमा आफ्नो प्रतिक्रिया दिनुहोस् !