जनकपुरधाम, असार २८ गते । दुई हप्ताभन्दा बढी समयदेखि जनकपुरधाम उपमहानगरपालिकाले फोहर नउठाउंदा नगर दुर्गन्धित हुन थालेपछि वडाअध्यक्षहरु सक्रिय भएका छन ।
जनकपुरधाम उपमहानगरपालिका वडा नम्बर ७ का वडाध्यक्ष जानकीराम साहले फोहोर उठाउन नगरक्षेत्रभित्र ७ वटा ट्रयाक्टर र एउटा जेसिबी खटाएका छन् । ल्यान्डफिल साईटको अभावका कारण नगरक्षेत्रको फोहोर गत दुई सातादेखि व्यवस्थापन गर्न नसकेको कारण नगर वर्षातको पानीले सडेपछि दुर्गन्धित हुन गएको छ ।
उपमहानगरले फोहोर फाल्दै आएको जग्गा व्यक्तिगत रहेको कारण जग्गाधनीले फोहर फाल्न नदिएपछि फोहोर उठाउन छाडेको अवस्थामा वडाध्यक्ष साहले आफ्नो निजी लगानी फोहोर उठाउने काम शुरु गरेको छ ।
जनकपुरधाम उपमहानगरले यसअघि नगरक्षेत्रको फोहोर वडा नम्बर–१६ मा विसर्जन गर्दै आएको थियो । तर हाल उक्त जग्गा कुनै व्यक्तिको रहेकोले उनले त्यहाँ फोहोर फाल्दा दुर्गन्ध, धुवाँ, धुलोले स्वास्थ्यमा प्रतिकूल असर पार्नुका साथै वरपर बस्नै नसक्ने गरी सास्ती खेप्नुपरेको भन्दै स्थानीय समेतले विरोध गरेपछि फोहोर फाल्न छाडिएको हो ।
अन्य वडाहरुको समस्याहरुलाई समेत दृष्टिगत गर्दै आफुले व्यक्तिगत पहलमा नगरक्षेत्रको फोहोर व्यवस्थापन तर्फ ध्यान केन्द्रित गरेको वडाध्यक्ष साहले बताए । उनले भने, फोहोर उठन नसक्दा यहाँका जनता आजित भइसकेका थिए । ठाउँठाउँमा फोहोर थुप्रिएको थियो । नगरप्रमुखले कुनै पहल गरेनन् त्यसैले अन्त्यमा म आफै जति सक्छु त्यति आफ्नै लगानीबाट यसलाई व्यवस्थापन गर्छु ।
वडाध्यक्ष साहले पहिलो चरणमा फोहोर उठाउनका लागि आइतवारदेखि वडा नम्बर १, २, ३, ४, ६, ७ र ९ का वडाध्यक्षहरुसँग समन्वय गरि ती वडाहरुमा समेत दुई जना सफाइ कर्मचारीसहित एउटा एउटा ट्रयाक्टर पठाएका छन् । यी वडाहरु बजारक्षेत्र भित्रको वडा रहेको र यहाँ फोहोरहरु बीच बाटोमै थुपारिएकोले नगरक्षेत्र दुर्गन्धित बनेको स्थानीयको गुनासोको आधारमा आफुले पहलकदमी लिएको उनले बताए ।
नगरप्रमुखले चासो देखाउन छोडेपछि मैले आफै फोहोर व्यवस्थापनको पहल गरेको छु,’वडाध्यक्ष साहले भने । संकलन गरिएका फोहोरहरु तत्कालका लागि वडा नम्बर–२४ बसहियास्थित आफ्नै जग्गामा राख्ने उनले बताए ।
वडाध्यक्ष साहले आफूहरु निर्वाचित भएको दिनदेखि नै फोहोर व्यवस्थापनका लागि उपमहानगरले आफ्नो जग्गा किन्नुपर्ने आवाज उठाउँदै आईरहेपनि त्यस तर्फ नगरप्रमुख लालकिशोर साहले कुनै ध्यान नदिएको आरोप लगाए ।
उपमहानगरपालिका भित्र फोहोर उठ्न नसकेपछि भानुुचोक, शिवचोक, जनकचोक, महावीर चोक, राजदेवी मन्दिर नजिक, रामचोक,रामानान्द चोक, पिडारीचोक लगायतका मुख्य चोकहरुमा फोहोरको डंगुर थुपारिएको छ ।
यो विषयमा आफ्नो प्रतिक्रिया दिनुहोस् !