जनकपुरधाम, असार २५ गते । लक्ष्मिनियाँ गाउँपालिका वडा नम्बर ३ ले चालु आर्थिक वर्षमा राम्रो काम गरेकोमा वडावासीले धन्यवाद ज्ञापन गरेका छन ।
चालु आर्थिक वर्ष २०७६/०७७ मा गरिएको काम बारे समीक्षा गर्ने उद्देश्यले बिहीवार वडाद्वारा आयोजित सार्वजनिक सुनुवाई कार्यक्रममा सहभागी वडावासीहरुले अन्य वडाभन्दा राम्रो काम यस वडामा भएको भनी वडाध्यक्ष सहित सदस्य र कर्मचारीलाई धन्यवाद ज्ञापन गरे ।
कार्यक्रममा वडा अध्यक्ष तेजकुमार यादवले चालु आर्थिक वर्षमा सम्पन्न योजनाहरु बारे वडावासीलाई जानकारी गराएका थिए । चालु आ.ब.मा सो वडाले पाएको ७५ लाखको योजनामा जेठ मसान्तसम्म करीब ९५ प्रतिशत काम गरिसकिएकोले त्यसको अनुगमन र मूल्यांकन गर्न वडावासीलाई अध्यक्ष यादवले आग्रह गरेका थिए ।
वडाले विकास निर्माण, शिक्षा, स्वास्थ्य र भौतिक पुर्वाधारतर्फ १६ वटा र गाउँविकास तर्फ ८ वटा योजना सम्पन्न गरेको छ । कोरोना भाइरस महामारी रोकथाम एवं नियन्त्रणका लागि जनचेतनामूलक प्रचार प्रसारदेखि जारी लकडाउनमा मार्कामा परेका परिवारलाई समयमै राहत लगायतका सहयोग गरेकोमा वडाका बुढापाका सहित सहभागी पुरुष तथा महिलाहरुले प्रसंशा गर्दै धन्यवाद ज्ञापन गरेका थिए ।
कार्यक्रममा वडा सचिव राजकुमार यादवले चालु आ.ब.मा कुन कुन योजना सम्पन्न भएको बारे विस्तारमा वडावासीलाई जानकारी गराउंदै आगामीको योजनाको लागि छलफल गर्न सहभागीहरुलाई आग्रह गरेको थियो ।
विगतमा सो वडा अन्तर्गतको गाउँहरु बर्सात महिनामा हिलाम्य हुने गरेकोमा स्थानीय तह कायम भएपछि वडाध्यक्ष तेजकुमारको प्रयासले ढलान सहितको सडक निर्माण भएपछि त्यसबाट स्थानीयले मुक्ति पाएको छ । वडाको प्रायः सडक पीसीसी ढलान र ग्राभेल भइसकेको छ बांकी रहेका केही सडकहरु बांकी वर्षमा सम्पन्न गरिसक्ने अध्यक्ष तेजकुमारले बताए ।
बनिगमा स्थित वडा कार्यालयमा सम्पन्न सो सार्वजनिक सुनुवाईमा अध्यक्ष तेजकुमार यादवले आगामी आ.ब.मा एक करोड रुपैया बरारबको बजेट विनियोजन भएकोमा विकास निर्माण, भौतिक पुर्वाधार, कृषि, शिक्षा र स्वास्थ्यमा के कति आवश्यकता छ भन्ने बारे योजना छनौट संकलन गरी आगामी बैठकमा त्यसमा छलफल गर्ने प्रतिबद्धता जनाएका थिए ।
यो विषयमा आफ्नो प्रतिक्रिया दिनुहोस् !