जनकपुरधाम, असार २३ गते । नेपाल सरकारले समाजिक संजालमा विज्ञापन गर्न/गराउन बन्देज लगाएको अवस्थामा प्रदेश २ सरकारले कोरोना भाइरस संक्रमण रोकथामको प्रचार प्रसारका लागि साढे तीन लाख रुपैया खर्चेको छ ।
विज्ञापनका लागि बन्देज लगाइएको समाजिक संजालमा प्रदेश २ सरकारको उद्योग, पर्यटन, वन तथा वातावरण मन्त्रालयले कोरोना भाइरस संक्रमणको जोखिम नियन्त्रण एवं रोकथामका लागि ३ लाख ५० हजार रुपैयाँ खर्च गरेको पाइएको छ ।
नेपाल सरकारले सामाजिक सञ्जालहरू फेसबुक, ट्विटर, इन्स्टाग्राम, युट्युबमा विज्ञापन गर्नु गैरकानुनी रहेको र यस्ता कार्य गरेमा कारबाही हुने चेतावनी दिदैं आएको बेला उक्त मन्त्रालयले अवैध रुपमा बिल पास गरी रकम निकासा गरेको हो ।
वैशाख मसान्तसम्मको कोरोना भाइरस सम्बन्धी पछिल्लो पटक मन्त्रालयले सार्वजनिक गरेको खर्च हिसाबमा सामाजिक सञ्जाल र अनलाईन मिडिया मार्फत प्रचार प्रसारमा बैशाख मसान्तसम्म मात्रै ३ लाख ५० हजार रुपैयाँ खर्च भएको देखाइएको छ ।
यस सम्बन्धमा उद्योग, पर्यटन, वन तथा वातावरण राज्य मन्त्री सुरेश मण्डलसँग जिज्ञासा राख्दा आफूलाई यस बारे केही थाहा नभएको भनी फोन काटि दिए । सचिव र मन्त्रालयका प्रवक्तालाई पटक पटक फोन गर्दा पनि फोन उठेन ।
मन्त्रालयले कोरोना भाईरस संक्रमण रोकथाम एवं नियन्त्रणका लागि बैशाख मसान्तसम्म बिभिन्न ४ वटा शीर्षकमा मात्रै कुल ३३ करोड ४२ हजार रुपैयाँ खर्च गरेको हो । जसमध्ये रेडियो एफ.एममा प्रचारप्रसार वापत ४ लाख ९२ हजार रुपैयाँ रहेको छ ।
त्यसैगरी कोरोना भाईरस संक्रमण रोकथाम एवं नियन्त्रणका लागि जारी लकडाउनले गर्दा मार्कामा परेका गरीब,दलित,विपन्न र दैनिक ज्यालादारीमा काम गर्ने मजदूरको राहत सामग्रीका लागि दुई चरणमा गरि ३२ करोड ९२ लाख रुपैयाँ खर्च गरिएको मन्त्रालयको खर्च हिसाबमा उल्लेख छ ।
राहतका लागि यस मन्त्रालयले पहिलो चरणमा बिभिन्न पालिकालाई १७ करोड ८० लाख रुपैयाँ दोश्रो चरणमा घरेलु तथा साना उद्योग कार्यालयहरुमार्फत १५ करोड १२ लाख रुपैयाँको राहत खर्च गरेको छ ।
पहिलो चरणको राहत मार्कामा परेका परिवारले त पाए तर दोश्रो चरणको राहत वडाध्यक्षहरु मार्फत वितरण गर्ने भनिएकोमा राहत संख्या कम भएको कारण विवाद हुन सक्ने डर अधिकांश वडाले राहतै उठाएन उठाएकाहरुले पनि घरमा लगेर थन्काइ दिएका छन ।
धनुषाका धनुषाधाम नगरपालिका, क्षिरेश्वरनाथ नगरपालिका र जनकपुरधाम उपमहानगरपालिकाका अधिकांश वडाले वितरणका लागि सो राहत उठाएको छैन ।
यो विषयमा आफ्नो प्रतिक्रिया दिनुहोस् !