जनकपुरधाम, असार १६ गते । नागरिकता विधेयकको विरुद्ध जनता समाजवादी पार्टी (जसपा) ले जनकपुरधाममा विरोध प्रदर्शन गरेको छ ।
विधेयकले विभेदकारी व्यवस्था गरेको भन्दै मंगलबार जनकपुरधामको जनक चौकबाट सयौंका संख्यामा नगरको विभिन्न भागको परिक्रमा गर्दै पुनः जनक चोक पुगी कोणसभामा परिणत भएको थियो ।
प्रदर्शनमा सहभागीहरुले ओली सरकार मुर्दाबाद, नागरिकता विधेयक खारिज गर, विधेयकमा छोरा र छोरीबीच विभेद अन्त्य गर लगायतका नारा लगाएका छन ।
कोण सभालाई सम्बोधन गर्दै प्रदेश २ प्रदेश सभा सदस्य परमेश्वर साहले यदि महिला र मधेशीको विरुद्धमा नागरिकता विधेयक फिर्ता नगरी पारित गराए भए भने देशका पुर्व मेचीदेखि पश्चिम महाकालीसम्म जसपा आन्दोलन गर्ने चेतावनी दिए ।
विदेशबाट बिहे गरेर नेपाल ल्याएकी बुहारीलाई सात वर्षपछि मात्रै अंगीकृत नागरिकता प्रदान गरिने तर नेपाली युवतीसँग विवाह गरेर नेपालमै बस्न चाहने युवकको लागि व्यवस्था नभएको भन्दै जसपाले यो विभेदकारी व्यवस्था भएको भन्दै विरोधमा प्रदर्शन गर्दै आएको छ ।
कोण सभालाई सम्बोधन गर्दै अर्का सदस्य रामआशिष यादवले विधेयकलाई साम्प्रदायिकको संज्ञा दिदै भने यो मधेश र महिला विरोधी रहेको छ, विधेयक फिर्ताका लागि सबै एकजुट भई अघि बढनुपपर्छ भने ।
त्यसैगरी प्रतिनिधि सभा सदस्य उमाशंकर अरगरियाले मधेशी महिलालाई राज्य सत्ताबाट बाहिर राख्न संघीय सरकारको षडयन्त्र रहेको आरोप लगाए ।
नागरिकता विधेयकमा जनता समाजवादी पार्टी र कांग्रेसले यस अघि भएको व्यवस्थालाई नै कायम राख्न सरकारलाई दबाब दिइरहेका छन् । तर सत्तारुढ दल नेकपाले विदेशी महिला नेपाली पुरुषसँग विवाह गरेर आएको ७ वर्षपछि मात्रै नागरिकता दिने व्यवस्था गर्न निर्णय गरिसकेको छ ।
मंगलबारको विरोध प्रदर्शनमा प्रदेश २ सरकारका आन्तरिक मामिला तथा कानून मन्त्री ज्ञानेन्द्र यादव, भूमि व्यवस्था, कृषि तथा सहकारी मन्त्री शैलेन्द्र साह, भौतिक पुर्वाधार विकास मन्त्री जितेन्द्र सोनल लगायतका मन्त्री सहित प्रदेश र जिल्लास्तरीय नेता तथा कार्यकर्ताहरुको उपस्थिति रहेको थियो ।
यो विषयमा आफ्नो प्रतिक्रिया दिनुहोस् !