जनकपुरधाम, जेठ २५ गते । राष्ट्रिय जनता पार्टी नेपाल र समाजवादी पार्टी नेपालको एकीकृत नयाँ पार्टी जनता समाजवादी पार्टी (जसपा) मा पदाधिकारीमा टुंगो लागेपछि आज दर्ता हुँदै छ ।
निवेदन दर्ताको ४५ दिनभित्र पार्टी दर्ता गराइ सक्नुपर्ने प्रावधान अनुरुप आज ५ जना पदाधिकारीमा टुंगो लागेपछि पार्टी दर्ताको प्रक्रिया अघि बढाइएको छ । श्रोतका अनुसार केही बेरमा निर्वाचन कार्यालय पुगेर दर्ता गराइनेछ ।
श्रोतका अनुसार लामो छलफल पश्चात पार्टीमा ३ जना अध्यक्ष र दुई जना वरिष्ठ नेतामा टुंगो लागेको छ । जसअनुसार राजपाबाट महन्थ ठाकुर, सपाबाट उपेन्द्र यादव र नयाँ शक्तिबाट डा. बाबुराम भट्टराई अध्यक्ष रहने सहमति भएको छ ।
त्यस्तै वरिष्ठ नेताद्वय राजेन्द्र महतो र अशोक राई पनि पदाधिकारी रहने छन् । बाँकी सबैको नाम मात्रै निर्वाचन आयोगमा पठाइने भएको छ ।
गत बैशाख १० गतेका दिन समाजवादी पार्टी (सपा) र राष्ट्रिय जनता पार्टी (राजपा)बीच भएको एकीकरण सहमति अनुसार आयोगमा निवेदन दर्ता गर्न जान लागेको समाजवादी पार्टीका नेता गंगानारायण श्रेष्ठले जानकारी दिए ।
राजनीतिक दल सम्बन्धी ऐनमा एकीकरण वा गाभिने घोषणा गरेको ४५ दिनभित्र सम्झौताको प्रतिलिपी संलग्न गरेर निर्वाचन आयोगमा निवेदन दिनुपर्ने व्यवस्था छ । जसपाले सम्झौता गरेको शनिबार ४५ दिन पुगेको थियो । तर शनिबार परेकाले आजसम्म निवेदन दिने म्याद बाँकी रहेको छ ।
निवेदनमा त्यस्ता दलमध्ये कुनै दलको नाममा गाभिने वा नयाँ नाममा एकीकरण हुने कुरासमेत खुलाउनु पर्ने र निवेदनमाथि आयोगले आवश्यक जाँचबुझ गरेर दल दर्ताको प्रमाणपत्र दिने प्रावधान रहेको छ ।
यो विषयमा आफ्नो प्रतिक्रिया दिनुहोस् !