जनकपुरधाम, जेठ २४ गते । प्रदेश २ सरकारका राज्यमन्त्रीका सहयोगी पछि उनका सवारी चालकमा समेत कोरोना पुष्टि भएको छ ।
शुक्रवार सार्वजनिक गरिएको पीसीआर परिक्षण रिपोर्ट अनुसार धनुषामा देखिएका ४ संक्रमति मध्ये एकजना प्रदेशका आर्थिक मामिला तथा योजना राज्यमन्त्री उषा यादवका सवारी चालक हुन ।
यसअघि बिहीवार प्रदेश सभाका ५ जना मर्यादापालक सहित राज्यमन्त्री यादवका स्वकीय सचिवमा कोरोना संक्रमण पुष्टि भएको थियो ।
कोरोना संक्रमित स्वकीय सचिव र सवारी चालकको निरन्तर सम्पर्कमा रहेकी राज्यमन्त्री यादव क्वारेन्टाईनमा बस्नुका सट्टा बाहिर घुमफिर गरिरहेको बताइएको छ ।
उनीसँगै अधिकांश समय रहने उनका दुईजना सहयोगी संक्रमित भएपनि उनी आफै अहिलेसम्म क्वारेन्टाइनमा नबस्नु भनेको संक्रमणको जोखिम बढेको मन्त्रालयका एक कर्मचारीले भने ।
शुक्रवार मिडिया ब्रिफिङ्गमा जानकारी गराइए अनुसार जनकपुरधाम उपमहानगरपालिकामा बस्दै आएका भनिएको २१ बर्षिय संक्रमित पुरुष आर्थिक मामिला तथा योजना राज्यमन्त्री उषा यादवको सवारी चालक रहेको जानकारी गराइएको थियो ।
संक्रमण पुष्टि भएका राज्यमन्त्रीका चालकको स्वाब प्रदेश सांसदहरुसँगै जेठ १६ गते प्रदेशसभा परिसरमा संकलन गरिएको थियो ।
यो विषयमा आफ्नो प्रतिक्रिया दिनुहोस् !