जनकपुरधाम, जेठ १६ गते । लकडाउनका कारण भारतबाट फर्केका धनुषाको जटही नाकामा मृत्यु भएका शहीदनगर नगरपालिकाका युवकको भोकले ज्यान गएको दाबी गरिएको छ ।
शुक्रवार आएको पीसीआर परिक्षणको रिपोर्टमा निगेटिभ आएपछि स्थानीय प्रशासनले विरेन्द्र यादवको मृत्यु भोकको कारण भएको दाबी गरेका हुन ।
स्थानीय प्रशासनका अनुसार करिव एक महिनासम्म मात्र चिउरा भुजाको सेवन र एक हप्ताभन्दा बढि पैदल हिडेर भारतबाट फर्किने क्रममा जटही नाकाबाट नेपाल प्रवेश गर्ने क्रममा नाकामै मृत्यु भएको हो ।
उनको शवलाई नेपाली सेनाको टोलीले प्रादेशिक अस्पतालमा ल्याएपछि स्वाब संकलन गरिएको थियो । स्वाब संकलनपछि गरिएको परीक्षणमा रिपोर्ट नेगेटिभ आएको प्रमुख जिल्ला अधिकारी कोषहरि निरौलाले जानकारी दिएका छन ।
रोजगारीका लागि भारतको सुरतमा एउटा होटलमा बिगत सात महिनादेखि शहीद नगरपालिकाका ९ गोठकोयपुरका विरेन्द्र काम गर्दै आएका थिए । कोरोना भाईरसका कारणले भारतमा लकडाउन हुँदा त्यहाँ कामकाज बन्द भएपछि उनलाई खाना खान समेत समस्या भएपछि त्यहाँबाट सात दिनदेखी चुउरा भुजा खाएर पैदल हिडदै जटही नाकामा पुगेको थियो ।
भोकले नै ज्यान गएको परिवारको पनि दाबी
पीसीआर रिपोर्ट निगेटिभ आएपछि परिवारजनले भोकले मृत्यु भएको दाबी गरेका छन । उनी सीमामा पुगे लगतै महिनादिनदेखि चिउरा भुजा खाइरहेको र भोकले स्वास्थ्य अवस्था ठिक नरहेको भनी लिन चाँडो आइदिन घरमा फोन गरेका थिए ।
उनको फोन आएलगत्तै उनका भाइ धिरेन्द्रसहित परिवारका ४ जना राति दुई घण्टा लगाएर एम्बुलेन्स खोजेका थिए । तर एम्वुलेन्स भेटदा भेटदै ढिलो भएको र उनलाई लिन गएको एम्वुलेन्स नपुग्दै बेहोस भएर उनको मृत्यु भएको परिवारजनले बताएका छन ।
रु. एक लाख राहत दिने घोषणा
यसैबीच धनुषाको शहीद नगरपालिकाले विरेन्द्रको पारिवारिक अवस्था दयनीय रहेको दृष्टिगत गर्दै राहत स्वरुप क्रियाखर्चका लागि एक लाख रुपैया दिने निर्णय गरेको छ ।
नगर प्रमुख उदय कुमार बरबरिया यादवले एक प्रेस विज्ञप्ति जारी गर्दै मृतक पिडित परिवारलाई दाहसंस्कार तथा क्रिया खर्चका लागि भन्दै १ लाख आर्थिक सहयोग सहयोग जनाएको छ ।
विज्ञप्तिमा भनिएको छ — यस शहीदनगर न.पा. वडा नं. ९ निवासी वर्ष ३२ को विरेन्द्र कुमार गुरमैता यादवको मिति २०७७÷०२÷१४ गतेको दिन मित्र राष्ट्र भारतवाट घर फर्कने क्रम्मा नेपाल भारत सिमानाको जटही नाकामा नीजको असामायिक निधन भएको ले शोक शन्तप्त परीवार प्रति गहिरो समवेदना प्रकट गर्दै क्रिया खर्च वापत रु.१,००,०००। (अक्षरेपी रु एक लाख) मात्र आर्थिक सहयोग उपलब्ध गराईने व्यहोरा अनुरोध गरिन्छ ।
यो विषयमा आफ्नो प्रतिक्रिया दिनुहोस् !