जनकपुरधाम, जेठ ९ गते । पाकिस्तानको कराँची विमानस्थल नजिकै यात्रुवाहक विमान दुर्घटनामा परेको छ ।
पाकिस्तानी टेलिभिजन जियो टीभीका अनुसार पाकिस्तान इन्टरनेशनल एइरलाइन्स (पीआईए) को A 320 यात्रुवाहक विमान दुर्घटनामा परेको हो ।
कराँचीस्थित जिन्नाह गार्डेन इन्टरनेशनल एयरपोर्टमा ल्याण्ड गर्नु केही मिनेट अगाडी नै नजिकै रहेको को रिहाइसी क्षेत्रमा दुर्घटनामा परेको छ ।
समाचार एजेन्सीका अनुसार विमानमा ९७ जना यात्रु र ८ जना पाइलट कर्मचारी सहित १ सय ७ जना सवार रहेको थियो । पाकिस्तानको नागरिक उड्डयन प्राधिकरणका अनुसार उक्त विमान लाहोरबाट आएको थियो ।
रमजान मनाउन नागरिकको सुविधाका लागि पाकिस्तानले घरेलु विमान संचालन गरेको थियो । सोही क्रममा लाहौरबाट उडेको विमान दुर्घटनामा पर्न गएको हो । लाहौरबाट उक्त विमान पाकिस्तानी समय अनुसार १ बजेर १० मिनेटमा उडेका थिए ।
समाचारमा जनाइए अनुसार विमान दुर्घटनामा परेको स्थानमा धेरै घरहरुमा पनि क्षति पुगेको छ । अहिले उद्धारको काम जारी रहेको छ तर साँघुरो बाटो र मानिसको भिडको कारण उद्धारमा कठिनाइ भइरहेको बताइएको छ ।
समाचार लेख्दासम्म दुर्घटना स्थलबाट उद्धार टोलीले १५/२० जनाको उद्धार गरी अस्पताल पठाएको छ । उद्धार गरिएका व्यक्तिहरु विमानमा सवार रहेका नभई क्षति पुगेका घरका रहेको बुझिएको छ, विमान रहेका सबै व्यक्ति मारिएको हुन सक्ने अनुमान गरिएको छ ।
उता पीआईएका प्रवक्ता अब्दुल्लाह हाफीजले एयरलाइन्सले यात्रा अवधिभर विमानबाट सूचना पाइरहेको र कुनै किसिमको समस्या नभएको बताए । उनले दुर्घटना हुनुमा केही प्राविधिक त्रुटि हुन सक्ने बताए । यो विमानको दुर्घटनाबारे स्वतन्त्र संस्थाले अनुसन्धान गर्ने उनले बताए ।
यो विषयमा आफ्नो प्रतिक्रिया दिनुहोस् !