जनकपुरधाम, जेठ ९ गते । स्वास्थ्य तथा जनसंख्या मन्त्रालयले कोरोना संक्रमण पुष्टि संख्यामा शुक्रवार गम्भीर त्रुटि गरेको छ । मन्त्रालयको यो तेश्रो पटकको गलती हो ।
शुक्रवार बिहान मन्त्रालयले संक्रमितको जारी गरेको सूचीमा ३० जना भनेको थियो, स्थलगत रिपोर्ट अनुसार २९ जना मात्रै पाइयो तर सूचीमा गिन्ती गर्दा ३५ जना रहेको छ ।
मन्त्रालयले सर्लाहीको गोडैता नगरपालिका र रामनगर बहुअर्वा गाउँपालिका गरी १५ जना भनेको थियो । तर त्यहाँका जनप्रतिनिधिले १४ जना मात्र रहेको बताएका छन । मन्त्रालयद्वारा जारी प्रेस विज्ञप्तिमा गोडैता नगरपालिका वडा नं. ८, ९, ११, १३ र १४ भनिएको थियो जबकि त्यहाँ १२ वटा वडा मात्रै रहेको छ ।
त्यहाँका मेयर देवेन्द्रकुमार यादवले जानकारी दिए अनुसार गोडैतामा १३ र १४ नम्बर वडा नै छैनन ।
मेयर यादवले संचारकर्मीसँग भने मन्त्रालय त गलती गरेकै छ टेकु प्रयोगशालाले समेत गलती गरेको छ । प्रयोगशालाले पठाएको सूचीमा गोडैताका संक्रमितको सूची १४ जनाको नाम पठाएको छ । तर गोडैतामा १३ जना मात्र संक्रमित छन । प्रयोगशालाले भनेको व्यक्ति हाम्रो क्वारेन्टाईनमै छैनन ।
उनका अनुसार गोडैतामा मात्रै १३ जना संक्रमित छन र एक जना रामनगर बहुअर्वा गाउँपालिका ७ का रहेका छन । तर मन्त्रालयले जारी गरेको सूचीमा गोडैताका ५ र रामनगरका १५ जनाको सूची प्रेस विज्ञप्तिमा जारी गरेका छन । दुवै पालिका मिलाएर २० जना हुन जान्छ । मेयरले बढी भएको व्यक्तिको नाम बताएपनि गोपनीयताको लागि समाचारमा उल्लेख गरिएको छैन ।
मन्त्रालयले यसअघि जनकपुरधाममा पत्रकार र पुस्तक व्यवसायीको सूची दोहरो प्रकाशित गरेर कोरोना थपिएको भनी सूची सार्वजनिक गरेको थियो ।
प्रेस विज्ञप्तिमा ३० जना भनेर उल्लेख गरेको छ । तर गिन्ती गर्दा नवलपरासीका ४, चितवनका २, कपिलवस्तुका ९ र सर्लाहीका २० जना गरी ३५ जना हुन आउंछ ।
मन्त्रालयको यो पहिलो गल्ती होइन यसअघि पनि ३० गते जनकपुरका पत्रकार र पुस्तक व्यवसायी सहितको सार्वजनिक गरेको सूची ३ दिनपछि दोहराएर सार्वजनिक गरेको थियो ।
यो विषयमा आफ्नो प्रतिक्रिया दिनुहोस् !