जनकपुरधाम, जेठ ५ गते । गलत रिपोर्ट दिएको भन्दै प्रदेश २ को प्रादेशिक अस्पताल जनकपुरधाममा जडित कोरोना भाइरस परिक्षणको पीसीआर मेसिन दोश्रो पटक बन्द गरिएको छ ।
पछिल्लो पटक बन्द गरिएको पीसीआर मेसिन दोश्रो जडित नयाँ मेसिन रहेको छ । यसअघि पहिलो मेसिन पनि राष्ट्रिय प्रयोगशालाले पठाएको पीसीआर मेसिनले भरपर्दो नतिजा दिन नसकेको भन्दै बन्द गरिएको थियो ।
गत २४ वैशाखमा संकलित पत्रकारहरुको स्वाब परीक्षण गर्दा प्रादेशिक अस्पतालस्थित पीसीआर मेसिनले नेगेटिभ नतिजा दिएको थियो । तर, राष्ट्रिय प्रयोगशाला टेकुमा परीक्षण गरिँदा एकजना पत्रकारसहित दुईजनामा पोजेटिभ देखिएपछि पीसीआर मेसिन बन्द गरिएको प्रादेशिक प्रयोगशाला स्रोतले बताएको छ ।
यहाँको पीसीआर मेसिनले सबै रिपोर्ट नेगेटिभ देखाएको थियो,’ प्रादेशिक प्रयोगशालामा कार्यरत एक कर्मचारीले भने, ‘तर, सोही स्वाब टेकुमा परीक्षण हुँदा दुईजनामा पोजेटिभ देखिएपछि तीनरचार दिनदेखि परीक्षण भएको छैन । अब संकलन गरिएका स्वाब टेकु पठाइने उनले बताए ।
पहिलो पटक प्राविधिकहरुले जडान गरेपनि पछिल्लो पटक पीसीआर मेसिन प्रयोशालाका निर्देशक डा. रुना झा स्वयं जनकपुर पुगेर जडान गरेकी थिइन ।
निर्देशक स्वयं आफैं आएर मेसिन जडान गर्न लगाएपछि पछिल्लो भन्दा अहिलेको मेसिन भरपर्दो हुने विश्वास लिइएको थियो, तर त्यस्तो भएन ।
प्रादेशिक प्रयोगशालाका निमित्त प्रमुख रामविनय साहले समेत पछिल्लो भन्दा अहिले जडान गरिएको मेसिन भरपर्दो रहेको प्रतिक्रिया दिएका थिए । उनले पोर्टेबल मेसिन भएको कारण रिपोर्ट फरक आउने गरेको समेत बताएका छन ।
प्रयोगशाला विज्ञहरुका अनुसार पीसीआर मेसिन पोर्टेबल र रियल टाइन गरी दुई थरीका हुन्छ । पोर्टेबल मेसिन मैनुवल हो यसमा जर्म अर्थात भाइरसको २० संख्या पुगेपछि रिपोर्ट पोजेटिभ देखाउने गर्छ तर रियल टाइम मेसिनमा ५० वटा मात्रै पोजेटिभ देखाउने गरेको कारण पनि जनकपुरधाम स्थित मेसिनले पोजेटिभ केसमा पनि निगेटिभ रिपोर्ट दिने गरेको छ ।
प्रादेशिक प्रयोगशाला र टेकुको रिपोर्ट पटकपटक फरक पर्न थालेपछि यहाँ कार्यरत प्राविधिकहरुको दक्षतामा समेत प्रश्न उठ्न थालेको छ । कतिपय जानकारहरु प्राविधिकलाई पर्याप्त तालिम नदिँदा यस्तो समस्या आएको बताउँछन् ।
प्रदेश सरकार आफ्नै पीसीआर किन्ने
प्रादेशिक अस्पतालमा जडित दुई वटै पीसीआर मेसिन संघीय सरकारले उपलब्ध गराएको हो । तर फरक रिपोर्ट दिन थालेपछि निकै आलोचना हुनथालेपछि प्रदेश सरकारले बढी क्षमता भएको दुई पीसीआर मेसिन खरिद गर्ने तयारी गरेको छ ।
जनकपुर र सप्तरीको राजविराजमा जडान गर्न प्रदेश सरकारले दुईथान पीसीआर खरिद गर्न लागेको हो । प्रदेश सरकारका प्रवक्ता आन्तरिक मामिला तथा कानुनमन्त्री ज्ञानेन्द्रकुमार यादवले पीसीआर खरिद गर्न टेन्डर प्रक्रिया अघि बढिसकेको बताए ।
जेठ ४ गते सम्बोधनको क्रममा मुख्यमन्त्री लालबाबु राउत प्रादेशिक अस्पतालमा बढी क्षमता भएको मेसिन किन्ने तयारी थालेको बताएका थिए ।
यो विषयमा आफ्नो प्रतिक्रिया दिनुहोस् !