जनकपुरधाम, नेपालमा कोरोना भाइरसबाट पहिलो व्यक्तिको मृत्यु भएको छ ।
धुलिखेल अस्पतालमा निधन भएकी सुत्केरी महिलाको मृत्यु कोरोना भाइरसबाट भएको सरकारले पुष्टि गरेको हो ।
स्वास्थ्य तथा जनसंख्या मन्त्रालयले शनिबार राति विज्ञप्ति जारी गर्दै नेपालमा कोरोनाका कारण पहिलोपटक मृत्यु भएको जानकारी दिएको छ । मन्त्रालयका अनुसार सिन्धुपाल्चोकको बाह्रबीसे नगरपालिकाको राम्चे घर भएकी २९ वर्षीया सुत्केरी महिलाको कोरोनाका कारण मृत्यु भएको हो ।
गत १० दिनअघि ती महिलाले काठमाडौंको महाराजगन्जस्थित त्रिवि शिक्षण अस्पतालमा सामान्य किसिमले शिशु जन्माएकी थिइन् । आमाछोरा दुवैको स्वास्थ्य सामान्य रहेका कारण उनीहरू वैशाख २५ गते डिस्चार्ज भएर घर फर्किएका थिए ।
तर घर पुगेपछि ती महिलालाई ज्वरो आउने, खोकी लाग्ने तथा श्वासप्रश्वासमा समस्या हुन थाल्यो । स्थानीय बाह्रबिसे प्राथमिक स्वास्थ्य केन्द्रमा उपचार गर्दा पनि निको नभएपछि धुलिखेल अस्पताल ल्याउने क्रममा बाटैमा उनको मृत्यु भएको हो ।
कोरोनासँग मिल्दो लक्षण देखिएपछि धुलिखेल अस्पतालकै प्रयोगशालमा उनको स्वाबको पीसीआर परीक्षण गर्दा रिपोर्ट पोजेटिभ आयो । अझ निश्चित गर्न उनको स्वाब राष्ट्रिय जनस्वास्थ्य प्रयोगशाला ल्याई परीक्षण गर्दा पनि रिपोर्ट पोजेटिभ नै देखिएको हो ।
विभिन्न संचार माध्यममा समाचार आएपछि मन्त्रालयले ढिलोगरी अनुसन्धान हुदैछ भनी राति ८ः५० बजे विज्ञप्ति जारी गर्दै ‘‘ नेपालमा कोभिड १९ बाट पहिलो व्यक्तिको मृत्यु भएको घोषणा गरेको हो ।
सरकारले कार्यविधि बनाएर मृतक महिलाको दाह संस्कार गरेको हो । मृत्युपछि परिवारलाई पनि शव परै १० मीटरको दूरीबाट हेर्न दिइएको थियो । कार्यविधि अनुसार उनको दाह संस्कार नेपाली सेनाले पशुपति घाटमा गरेका हुन ।
नेपाली सेनासहित नेपाल प्रहरी र सशस्त्र प्रहरी समेतको टोलीले स्कर्टिङ गरेर अन्त्येष्टिका लागि पशुपति घाटमा पुगेर गरेका हुन । शवको विद्युतीय शवदाह गृहमा अन्त्येष्टि गरिएको छ ।
यो विषयमा आफ्नो प्रतिक्रिया दिनुहोस् !