जनकपुरधाम, जेठ २ गते । जनकपुरधाम उपमहानगरपालिकाले कोरोना भाइरस संक्रमणको शंकास्पद व्यक्तिलाई राख्न बनाएको क्वारेन्टाइनमा जनावर सरह व्यवहार हुने गरेको आरोप लगाइएको छ ।
जनकपुरधाम उपमहानगरपालिका वडा नम्बर ७ स्थित स्वस्तिक हस्पिटलमा सञ्चालित सो क्वारेन्टाइन सरकारी मापदण्ड विपरीत रहेको र सरसफाइको कुनै व्यवस्थापन नरहेको विगत तिन दिनदेखि त्यहाँ रहेकी एक महिलाले बताएकी छिन ।
उनले भनिन– ‘सरकारले कोरोना भाइरसको संक्रमणबाट नागरिकलाई सुरक्षित राख्न शंकास्पद व्यक्तिलाई कम्तिमा १४ देखि १७ दिनसम्म क्वारेन्टाइनमा सुरक्षित तथा व्यवस्थित तरिकाले राख्न मापदण्ड बनाएको छ । तर जनकपुरधाम उपमहानगरपालिकाले निर्माण गरेको यो ठाउँ क्वारेन्टाइन सञ्चालन तथा व्यवस्थापन गर्न बनेको मापदण्ड २०७६ विपरीत रहेको छ ।’
पति नर्सिंग क्याम्पसस्थित आइशोलेसनमा रहेकी सो महिला आफ्नो ५ बर्षीय र २ बर्षीय दुई बच्चासहित उक्त क्वारेन्टाइनमा रहेकी छिन । तर उनीसँग मानवीय व्यवहार नभई जनावर जस्तै व्यवहार भइरहेको आरोप लगाएकी छिन ।
संचारकर्मीसँग कुरा गर्दै उनले भनिन खाना दिइएको छैन बच्चाहरु दूई दिनदेखि घरबाट ल्याएको बिस्कुट र चाउचाउ खाएर बसेका छन् । तिन दिनदेखि यहाँ बसेको छु तर सफाइ कर्मचारीको अहिलेसम्म मुख पनि हेरेको छैन रुदैं भनिन उनले आफू के कुनै अपराध गरेको हो ।
जेल जस्तो व्यवहार खेप्नु परिरहेको सुनाउँदै उनले भनिन– तीन दिनमा एक दिन मात्रै खाना दिइएको छ, त्यो पनि खाना पुर्याउन आउने व्यक्ति गेटबाटै कुकुरलाई दिएजस्तै खाना फालेर भाग्छन ।
क्वारेन्टाइनमा कोठाको व्यवस्थापन गर्दा एउटा खाटदेखि अर्को खाटसम्मको न्युनतम दूरी ३.५ फिट हुनुपर्ने नियम सरकारले तोकेको छ । क्वारेन्टाएनमा बस्नेहरुका लागि स्वास्थ्य, सञ्चार, पानी र विद्युतको व्यावस्था गर्नुपर्ने हुन्छ । तर यहाँ एउटै कोठामा ११ जनालाई एकमिटर भन्दा पनि कम डिस्टान्समा राखिएको उनले दुःखेसो सुनाइन् ।
क्वारेन्टाइनमा बस्नेहरुका लागि बिहान ७ः३० देखि ८ बजेसम्म चिया र खाजा, बिहान ११ः३० देखि १२ बजेसम्म दिवा खाजा, दिउँसो २ः३० बजेदेखि ३ बजेसम्म खाजा र बेलुकी ७ः३० देखि ८ बजेसम्म रात्री खाना व्यवस्था गरिने सरकारी मापदण्डमा तोकिएको छ ।
खानाको व्यवस्था गर्दा स्थानीय उपलब्धतालाई मध्यनजर गरी स्वस्थ्यकर खानाको प्रबन्ध मिलाउनुपर्ने उल्लेख छ । तर उपमहानगरले बनाएको यस क्वारेन्टाइनमा साँझ बिहान पनि खाने प्रबन्ध नभएको व्याप्त गुनासाहरु क्वारेन्टाईनमा बस्दै आएकाहरुको छ ।
उनीहरुले गुनासो गर्दा थाकिसके तर सुधारको त कुरै छाडौ सुन्नेवाला पनि कोही छैन ।
यो विषयमा आफ्नो प्रतिक्रिया दिनुहोस् !