जनकपुरधाम, वैशाख २७ गते । प्रदेश २ प्रादेशिक अस्पतालमा कोरोना भाइरस उपचारका लागि स्थापित ‘कोरोना विशेष अस्पताल’ सञ्चालनमा आएको छ ।
प्रदेश सरकारले सञ्चालनमा प्रादेशिक अस्पताल अन्तर्गत रहेको नर्सिंग क्याम्पसमा स्थापित सो विशेष अस्पतालमा सम्भावित कोरोना संक्रमित गर्भवतीको प्रसुति साथै शल्यक्रिया गर्नेसमेत व्यवस्था रहेको छ ।
पचास बेडको रहेको सो विशेष अस्पतालमा ८ बेड आइसीयुको व्यवस्था रहेको सामाजिक विकास मन्त्रालयका सचिव डा रामप्रसाद घिमिरेले जानकारी दिएका छन ।
जनकपुरधामस्थित प्रादेशिक अस्पतालमा सञ्चालित लेभल १ को सो कोरोना अस्पतालबाट सिफारिस गरिएका मध्यम, जटिल र अतिजटिल बिरामीको सो विशेष अस्पतालमा उपचार हुने उनले जानकारी दिए ।
सो विशेष अस्पताल सञ्चालनमा आएपछि कोरोनाको उपचारमा महत्वपुर्ण योगदान पुग्ने विश्वास गरिएको छ । यसका साथै विशेष अस्पताल सञ्चालन गर्ने प्रदेश सरकारको नीति अनुरुप पर्साको पोखरिया ४ स्थित अस्पतालमा ८ बेडको आइसोलेसनकक्ष पनि सञ्चालनमा आएको छ ।
यसैबीच प्रदेश २ को कोरोना संक्रमणबाट बढी प्रभावित वीरगञ्जको छपकैयामा शनिवार र आइतबार गरी दुईदिन थप जनशक्तिका साथै स्वाबको नमुना संकलन कार्यमा तीव्रता ल्याइने छ । वीरगञ्जको वडा नं १, २ र ३ लाई स्थानीय प्रशासनले ‘सिल’ गरी कन्टयाक्ट ट्रेसिङ र स्वाबको नमुना संकलन कार्य जारी राखेको छ ।
सो स्थानमा एकै परिवारका १७ जनामा कोरोना भाइरस भेटिएपछि ती परिवारको आसपासका १८ परिवारका साथै सम्पर्कमा आएका व्यक्तिको पहिचान गरी स्वाबको नमुना संकलन कार्यलाई प्रमुखताका साथ अगाडि बढाएको हो ।
सो क्षेत्रमा स्वाब संकलन कार्यमा तीव्रता ल्याउन स्वास्थ्य मन्त्रालयका ‘भाइरल ट्रान्सपोर्ट मिडियम’ (भिटीएम) सहितको जनशक्तिका साथै प्रदेश सरकारका प्रतिनिधि, स्वास्थ्यकर्मीका टोली, प्रादेशिक स्वास्थ्य तालिम केन्द्र पथलैया, नारायण अस्पतालका साथै पर्साका स्वास्थ्य संस्थाका स्वास्थ्यकर्मी सो कार्यमा जुटेको बताइएको छ ।
सिल गरिएका सो क्षेत्रमा शुक्रबार २ सय ६२ जनाको स्वाबको नमुना संकलन गरिएको थियो भने अहिलेसम्म तीन हजार १ सय ७३ को सो कार्य गरिएको छ । अहिलेसम्म दुई हजार ३ सय ९३ को रिपोर्ट नेगेटिभ आएको छ भने ७ सय ५० जनाको रिपोर्ट आउन बाँकी छ ।
प्रदेशमा हालसम्म अहिलेसम्म ३१ कोरोना संक्रमित भएका छन् भने २ जना उपचार गराइ घर फर्केका छन् । २९ जनाको वीरगञ्जस्थित नारायणी अस्पतालमा उपचार भइरहेको जनाइएको छ ।
यो विषयमा आफ्नो प्रतिक्रिया दिनुहोस् !