जनकपुरधाम, वैशाख २६ गते । कोरोना संक्रमणको उच्च जोखिममा रहेका प्रदेश २ मा कोरोना परिक्षण गर्ने भिटिएम किटको अभाव भएको छ ।
प्रदेश २ मा हाल कोरोना भाइरस परिक्षण गर्ने भिटिएम किट ५ सय थान मात्रै मौज्दात रहेको सामाजिक विकास मन्त्रालय अन्तर्गतको स्वास्थ्य आपूर्ति व्यवस्थापन केन्द्रले जनाएको छ ।
अहिले भिटिएम किट अभावका कारण कोरोना परीक्षण नै रोकिएको त छैन, तर शंकास्पद बिरामी आएमा कोरोना परिक्षण गर्नका लागि किट अभाव हुने आपूर्ति महाशाखाका निर्देशक डाक्टर प्रमोद कुमार यादवले बताए ।
भारतबाट आएका र बैदेशिक रोजगारमा गएका अथवा विभिन्न जिल्लाबाट आएकाहरुमा केही लक्षण देखिएमा वा कोरोना आशंका भएमा कोरोना परिक्षण गर्ने भरपर्दो विधि (भिटिएम) पिसिआर किट ५ सय थान मौज्दात हुँदा परिक्षणमा समस्या हुने निश्चित छ ।
किटको अभाव हुँदा कतिपय स्थानका क्वारेन्टाइनमा १४ दिनभन्दा बढी बसिसकेकाहरुको समेत स्वाब परीक्षण हुन नसकेको डा.यादवले बताए । भीटीएम किटको अभाव भएपछि क्वारेन्टाइनमा बसेका कतिपयको समय पुगिसकेपनि रोकेर राखिएको उनले बताए ।
संघीय सरकारले प्रदेश २ का लागि चैत १२ गते ४० थान, वैशाख १३ र २३ गते १÷१ हजार थान गरी जम्मा २ हजार ४० थान भीटीएम किट पठाएको थियो । वैशाख २३ पछि संघीय सरकारले प्रदेश २ लाई भीटीएम किट पठाएको छैन् ।
प्रदेश २ को लागि न्यूनतम २० देखि २५ हजार भीटीएम किट आवश्यक रहेको बताउँदै निर्देशक यादवले किट खरिद गर्न प्रदेश सरकारले प्रक्रिया सुरु गरिसकेको जानकारी दिए ।
त्यस्तै प्रदेश २ मा आरडीटी किट पनि जम्मा १ सय थान मात्र मौज्दात रहेकाले यो पनि अपुग भएको उनले बताए ।
संघिय सरकारले प्रदेश २ लाई चैत २९ गते ५ हजार थान, बैशाख ५ गते २ हजार थान र बैशाख २३ गते १ हजार थान आरडीटी किट पठाएको थियो । सामाजिक विकास मन्त्रालयको स्वास्थ्य आपूर्ति व्यवस्थापन केन्द्रका सूचना अधिकारी श्रवणकुमार नायकले सबैभन्दा बढी आरडीटी र भीटीएम किट रौतहट, बारा र पर्सा पठाइएको जानकारी दिए ।
तीनवटै जिल्लामा कोरोना संक्रमित फेला परेपछि ‘कन्ट्याक्ट ट्रेसिङ’ गर्नुपर्ने भएकोले सबैभन्दा बढी किटहरु तीन जिल्लामा पठाउनु परेको उनले बताए । उनले अहिलेको मौज्दातले बढीमा २ दिनसम्म मात्र धान्नसक्ने जानकारी दिए ।
प्रदेश २ का ८ वटै जिल्लामा अहिलेसम्म ५ हजार ३ सय ५३ जनाको आरडीटी परीक्षण गरिएको छ । त्यसमध्ये १० जनाको रिजल्ट पोजेटिभ आएको छ भने ५ हजार ३ सय ४३ जनाको रिपोर्ट नेगेटिभ देखिएको छ ।
प्रदेश २ मा अहिलेसम्म २ हजार ७ सय ५३ जना कोरोनाभाइरसका शंकास्पद बिरामीहरुको थ्रोट स्वाब संकलन गरिएको छ । ती मध्ये ३० जनाको रिपोर्ट पोजेटिभ देखिएको छ भने २ हजार ३ सय ७२ जनाको रिपोर्ट नेगेटिभ आएको छ । ३ सय ५१ जनाको रिपोर्ट आउन बाँकी रहेको छ ।
यो विषयमा आफ्नो प्रतिक्रिया दिनुहोस् !